27 шілде. Минск. Интерфакс – АҚШ Қорғаныс министрлігі Балтық елдеріндегі америкалық әскери контингенттің санын қысқарту мәселесін шұғыл түрде қарастырмайтынын мәлімдеді. Бұл туралы Литваның ұлттық қорғаныс министрі Довиле Шакалене АҚШ-тың қорғаныс министрі Пит Хегсетпен Пентагонда өткен келіссөздерден кейін хабарлады. Кездесуге сондай-ақ Латвия мен Эстонияның қорғаныс министрлері де қатысты.
«Өңірімізде америкалық әскердің болуы мәселесінде қандай да бір шұғыл шешім қабылданбайтынына қатысты АҚШ тарапынан берілген кепілдікті біз жоғары бағалаймыз. Әскери қатысудың аймақтық қауіпсіздік тұрғысынан маңызы зор екені жөніндегі дәлелдеріміз назарға алынды», – деді Шакалене. Бұл туралы Литва Қорғаныс министрлігінің баспасөз қызметі хабарлады.
Министрдің айтуынша, АҚШ үшін Балтық аумағында тек әскери инфрақұрылым құру ғана емес, сонымен бірге кешенді оқу-жаттығуларды — құрлықтағы, әуедегі, ұшқышсыз ұшу құралдарын және радиоэлектронды жүйелерді қамтитын әскери жаттығулар өткізу де маңызды.
«Бұл тұрғыда Литвада салынып жатқан жаңа оқу-жаттығу полигоны ерекше мәнге ие. Ол аймақтық қауіпсіздікке ықпал ететін маңызды стратегиялық нысанға айналмақ», — деп атап өтті Шакалене.
