30 шілде. ИНТЕРФАКС – Жапония метеорологиялық агенттігі сәрсенбі күні таңертең Камчатка түбегіне жақын маңда болған жер сілкінісінен кейін елдің Тынық мұхиты жағалауында цунами қаупі туралы ескерту таратты, деп хабарлайды NHK телеарнасы.
Ескерту Хоккайдо аралынан бастап Кюсю аралына дейінгі префектураларды қамтиды. Мамандар теңіз толқынының биіктігі 1 метрге дейін жетуі мүмкін деп болжауда.
Жапония сейсмологтарының мәліметінше, Камчатка маңындағы жер сілкінісінің магнитудасы 8,0-ге жеткен.
Бұған дейін Ресей ғылым академиясының Единая геофизическая служба (ЕГС) Камчатка филиалы Тынық мұхитта, Петропавловск-Камчатский қаласынан 161 шақырым шығыста, 32 шақырым тереңдікте магнитудасы 7,5 болатын жер сілкінісі тіркелгенін хабарлады.
Камчатка өңірлік Төтенше жағдайлар департаментінің мәліметінше, Петропавловск-Камчатскийдің бірқатар аудандарында сілкініс күші 7–8 балл шамасында сезілген.
ЕГС филиалы Авача шығанағы жағалауында цунами қаупіне байланысты дабыл жарияланғанын мәлімдеді.
