Саясаттанушы Марат Шибутов Қасым-Жомарт Тоқаевтың Түркияға сапарының нәтижесі жөнінде былай деп жазды: «Жалпы алғанда, сапар негізінен экономикалық сипатқа ие болды. Қол қойылған 18 келісімнің кем дегенде үштен бірі іске асырылатын болса, бұл Түркияның Қазақстандағы инвестициялық белсенділігі үшін елеулі серпін болмақ. Қазіргі уақытта түрік инвесторларының басым бөлігі шағын және орта деңгейдегі жобаларға салынған, ірі кәсіпорындар өте аз. Сондықтан да бұл сапар екі тарапқа да тиімді болмақ. Жалпы, Түркия бізге қажет ел, бірақ ашығын айтқанда, Түркияға біз көбірек керекпіз. Тоқаевқа көрсетілген ерекше құрмет пен ықыластың бір себебі де осы. Әрине, енді жобалардың іске асуын күту керек, бірақ Президент бұл сапарда түрік тарапынан мүмкін болатын ең жоғарғы нәтижеге қол жеткізген сияқты».
Евразия24 пікірі:
Қасым-Жомарт Тоқаевтың Түркияға сапарының алдында Қазақстан түрік азаматтары үшін визасыз режимді 30 күннен 90 күнге дейін ұзартқаны кездейсоқ емес. Әлемдік саясатта миграциялық режимді жеңілдету әрқашан достық қарым-қатынастың белгісі ретінде қабылданып, іскерлік ынтымақтастықты нығайтуға ықпал етеді. Астана мен Анкара – көп жылдан бері тығыз әріптестік орнатқан елдер. Қазіргі таңда екі ел арасында 60-тан астам шарт пен келісім бар ауқымды құқықтық негіз қалыптасқан. Іссапар қорытындысы бойынша Қасым-Жомарт Тоқаев БАҚ өкілдеріне берген мәлімдемесінде: «Екі ел арасындағы әртүрлі саладағы байланыстарды жандандыруға бағытталған маңызды үкіметаралық құжаттарға қол қойылды. Түркия сауда-экономикалық және инвестициялық салалардағы негізгі стратегиялық серіктестеріміздің бірі болып табылады. Сондықтан да өзара тауар айналымын ұлғайту мәселелеріне ерекше көңіл бөлінді. Былтырғы жылы екіжақты сауда көлемі 5 миллиард долларға жетті. Болашақта бұл көрсеткішті едәуір арттырамыз. Бұған әлеуетіміз жетеді», – деп атап өтті.
Осы ретте визасыз режимнің ұзаруы түрік капиталының Қазақстан нарығына келуін жеңілдетуге бағытталған шара деп қарастыруға болады.
