Нижний Новгород. 21 тамыз. ИНТЕРФАКС – «Росатом» мемлекеттік корпорациясы Түркиядағы «Аккую» атом электр станциясын келесі жылы пайдалануға беруді көздеп отыр. Бұл туралы компания басшысы Алексей Лихачев журналистерге мәлімдеді.
«Біз жоспарлы мерзімнен 3-4 айға кешігіп отырмыз. Дегенмен, станцияны алдағы жылы өнеркәсіптік пайдалануға тапсыру жоспар бойынша іске асады», – деді ол.
«Аккую» – Түркия аумағында салынып жатқан алғашқы атом электр станциясы. Нысан Мерсин провинциясында орналасқан, жобада қуаты 1200 МВт болатын төрт энергоблок қарастырылған. Бұған дейін Түркия билігі Синоп және Фракия провинцияларында тағы екі АЭС салу мүмкіндігін қарастырып жатқаны хабарланған.
2024 жылғы қазанда Ресей вице-премьері Александр Новак Siemens компаниясының жабдықты жеткізбей қойғанына байланысты туындаған қиындықтар жобаның жалпы кестесіне ықпал етуі мүмкін екенін айтқан болатын.
«Келісімшартқа қарамастан, Батыс елдерінің бірі – Германиядағы Siemens компаниясы жабдықтың бірқатар түрін жеткізу жөніндегі міндеттемесін орындаған жоқ. Бұл мәселе туындағаннан кейін «Росатом» түрік серіктестерімен бірлесіп шұғыл шара қабылдап, шешім тапты: қажетті жабдық достас мемлекеттерден сатып алынды», – деп түсіндірді ол.
Ал 2025 жылдың басында Алексей Лихачев «Росатомның» Siemens-ке қатысты «Аккую» АЭС-іне жеткізілмеген жабдық үшін сот талап-арызын әзірлеп жатқанын мәлімдеген еді.
