Дубай. 8 қыркүйек. ИНТЕРФАКС – Палестиналық ХАМАС қозғалысы АҚШ тарапының мәлімдемесіне үн қатып, Израиль азаматтарын босату мәселесін талқылауға дайын екенін жеткізді.
“ХАМАС біздің халқымызға бағытталған қарулы шабуылды тоқтатуға бағытталған кез келген бастаманы қолдайды”, – делінген ұйымның ресми мәлімдемесінде.
ХАМАС тарапынан атап өтілгендей, қозғалыс соғысты толық тоқтату, Израиль қарулы күштерінің Газа секторынан толықтай шығуы және аумақты басқару үшін тәуелсіз палестиналық комитет құру жөніндегі нақты шарттар негізінде барлық тұтқындарды босату бойынша келіссөздерге бірден кірісуге әзір.
Ұйым, сондай-ақ, АҚШ тарапынан атысты тоқтатуға бағытталған бірқатар ұсыныстар алынғанын және бұл ұсыныстарды екіжақты уағдаластыққа айналдыру мақсатында араағайын елдермен тұрақты байланыс жүргізіліп жатқанын мәлім етті.
Бұған дейін АҚШ-тың бұрынғы президенті Дональд Трамп Truth Social платформасында Израильдің АҚШ-тың қолдауымен тұтқындарды босату жөніндегі жаңа келісімге келіскенін жазған еді. Ол ХАМАС-ты да бұл бастаманы қабылдауға шақырды.
“Израиль менің шарттарымды қабылдады. Енді ХАМАС та келісуі керек. Мен оларды бас тартудың салдары туралы ескерттім. Бұл – соңғы мүмкіндік, келесі жолы болмайды”, – деп жазды Трамп.
