Ақорда хабарлайды: «Мемлекет басшысы Қаржылық мониторинг агенттігінің төрағасы Жанат Элимановты қабылдады.
Кездесу барысында Жанат Элиманов кірістерді заңдастыруға қарсы қабылданып жатқан шаралар жөнінде баяндады. Агенттік жүргізген жұмыстардың нәтижесінде 24 миллиард теңгеден астам қаражатты қолма-қол ақшаға айналдырған жалған компаниялар анықталды.
Сонымен қатар, заңсыз криптовалюта айырбастау операцияларын жүзеге асырған 20 астыртын алаңның қызметі тоқтатылды. Бұл алаңдар негізінен есірткі саудасынан және алаяқтық жолмен алынған табыстарды жасырумен айналысқан. Бұған қоса, ТМД аумағында ең ірі саналатын криптосервис жойылды. Ол Darknet желісіндегі 20-дан астам алаңмен байланысты болған және 200-ден астам есірткі дүкеніне қызмет көрсеткен.
Тергеу нәтижесінде құны 9,7 миллион АҚШ долларына тең виртуалды активтер бұғатталды. 720 қылмыстық іс бойынша тергеу аяқталғаны, оның ішінде үшеуі трансұлттық сипаттағы 15 ұйымдасқан қылмыстық топтың қызметі тоқтатылғаны туралы ақпарат берілді. 63 инфрақұрылымдық жоба бойынша 164 миллиард теңге көлеміндегі негізсіз бюджет шығындарының жолы кесілді, ауыл шаруашылығы саласында 11 миллиард теңгенің субсидиясы тиімсіз пайдаланылғаны анықталды. Бірыңғай жинақтаушы зейнетақы қорынан стоматологиялық қызмет көрсетілді деген желеумен 200 миллиард теңге заңсыз шешіп алынғаны белгілі болды. Заңсыз микрокредит беру фактілері бойынша жалпы сомасы 71 миллиард теңгені құрайтын 23 тергеу басталды. 300 мыңнан астам қарыз алушының берешегін қайтару және есептен шығару бағытында жұмыс жүргізіліп жатыр. 112 мыңнан астам адам тартылған 45 қаржы пирамидасы таратылды. Алаяқтық сипаттағы жобалар мен құмар ойындарға қатысты 31,5 мың сайт пен сілтеме бұғатталды».
Евразия24 пікірі:
Қаржылық мониторинг агенттігі (ҚМА) қызметінің нәтижесі – қазіргі қоғамдағы жүйелі мәселелерді айқын көрсететін көрсеткіш іспетті. Азаматтардың өз қауіпсіздігіне қарсы бағытталған қылмыстар мен құқықбұзушылықтардың санына қарағанда, қазақстандықтардың жеке қауіпсіздікке деген жауапкершілігі мен төзімі өте төмен. Әйтпесе алаяқтық фактілерінің жылдан-жылға артуын басқаша қалай түсіндіруге болады? Мемлекет бейтаныс адамдармен қарым-қатынаста сақ болу қажеттігін түрлі ақпарат құралдары арқылы үздіксіз ескертіп келеді. Алайда азаматтар соған қарамастан, қиындықтарға тап болып отыр. Бірыңғай жинақтаушы зейнетақы қорынан ойдан шығарылған қызметтерге деп қаражат шешіп алу — осы бейқамдықтың тағы бір көрінісі. Сол сияқты, есірткі заттарын сату үшін тыйым салынған «наркошоптар» желісінің кеңеюі де жағдайдың қаншалықты ушығып кеткенін көрсетеді. Қоғамда өмір құндылығына деген көзқарас осындай деңгейде болса, сырттан жау іздеудің де қажеті жоқ — қоғамның өзі іштен іріп-шіріп барады.
