Астана. 24 қыркүйек. ИНТЕРФАКС-ҚАЗАҚСТАН – Қазақстан Парламенті Мәжілісінің сәрсенбі күнгі жалпы отырысында «Қылмыстық жолмен алынған кірістерді заңдастыру (жылыстату) және терроризмді қаржыландыру тәуекелдерін бағалау жөніндегі халықаралық орталықты құру туралы келісімді ратификациялау туралы» заң қабылданды.
Мәжілістің қаржы және бюджет комитетінің қорытындысында атап өтілгендей, Қылмыстық кірістерді жылыстату және терроризмді қаржыландыру тәуекелдерін бағалау жөніндегі халықаралық орталық (ҚЖТҚО) – бұл ТМД елдерінің қаржылық барлау бөлімшелері арасындағы өзара іс-қимылды ұйымдастыруға арналған халықаралық ақпараттық жүйе болып табылады. Орталықтың негізгі мақсаты – анықталған қауіптерге уақтылы ден қоюды қамтамасыз ету.
Келісімге сәйкес, ҚЖТҚО арқылы қылмыстық топтар қолданатын тәсілдер мен үрдістерді, соның ішінде жаңа технологияларды зерделеу жоспарлануда. Сондай-ақ орталық шекара маңы қауіптерін талдауға, статистикалық деректер алмасуға және тәуекелдерді төмендетуге бағытталған ұсынымдар әзірлеуге мүмкіндік береді.
Құжатты Мәжіліс депутаттарына таныстырған Қаржылық мониторинг агенттігі төрағасының орынбасары Жеңіс Елемесов орталықтың ТМД елдерінің қаржылық барлау құрылымдары арасындағы тиімді мемлекетаралық өзара іс-қимылды қамтамасыз етуге бағытталған қорғалған ақпараттық жүйе ретінде құрылатынын атап өтті.
Оның айтуынша, орталықтың маңызды міндеттерінің бірі – трансшекаралық қылмыстық топтардың қызметін, оның ішінде қаржы қаражатының транзиттік қозғалысын талдау болады.
Мәжіліс мақұлдаған заң жобасы Парламент Сенатының қарауына жолданды.
