Минск. 24 қыркүйек. ИНТЕРФАКС – Польша Республикасының Ішкі істер және әкімшілік министрлігі Беларусьпен шекарадағы кейбір бақылау-өткізу бекеттері 25 қыркүйектен бастап жұмысын қайта бастайтынын мәлімдеді.
Министрліктің мәліметінше:
«Жеңіл көліктер үшін Тересполь – Брест шекаралық өткелі қайта ашылады. Жүк көліктері Кукурыки – Козловичи өткелі арқылы өте алады. Ал жүк пойыздарының қозғалысы Кузница-Белосток – Гродно, Семянувка – Свислочь және Тересполь – Брест бағыттарында қайта жанданады», – делінген хабарламада.
Министрлік шешімнің жан-жақты жағдайлық талдаудан кейін қабылданғанын атап өтті. Сонымен қатар:
«Шығыс шекарадағы жағдай ушығатын болса, үкімет бақылау-өткізу пункттерін кідіріссіз қайта жабатынын нақты жеткізді. Польша азаматтарының қауіпсіздігі – біздің басты басымдығымыз», – деп мәлімдеді ведомство өкілдері.
Бұған дейін Польша ІІМ басшысы Марчин Кервиньский 25 қыркүйек, бейсенбі күнгі 00:00-ден бастап польша-беларусь шекарасындағы бақылау-өткізу пункттерінің жұмысын қайта жандандыру туралы бұйрыққа қол қойған болатын.
Еске сала кетейік, 12–16 қыркүйек аралығында Беларусь аумағында «Батыс-2025» бірлескен беларусь-ресей оқу-жаттығулары өткізілді. Осыған байланысты Польша билігі қауіпсіздік мақсатында Беларусьпен шекараны уақытша толықтай жапқан еді.
Оқу-жаттығу 16 қыркүйекте аяқталғанымен, шекарадағы өткізу бекеттері бірден ашылған жоқ. Польша билігі қозғалысты тек шекара толық қорғалған кезде қалпына келтіруге уәде берген болатын.
