Еуразиялық экономикалық комиссия хабарлайды: «ЕАЭО-да жүк тасымалын бақылау үшін навигациялық пломбалар қолданыла бастайды. Еуразиялық экономикалық комиссия Алқасының шешімімен Еуразиялық экономикалық одақ аясында жүк тасымалын қадағалау мақсатында навигациялық пломбаларды қолдану жөніндегі келісімнің аясында тасымалды бақылау енгізіледі. Бұл шешім 2026 жылғы 1 ақпаннан бастап күшіне енеді. Жобаны жүзеге асыру үш кезеңге бөлінген, жалпы ұзақтығы — бір жарым жыл. «Аталған шешімге сәйкес ЕАЭО елдерінде тауарларды навигациялық пломбалар арқылы қадағалаудың алғашқы кезеңі басталады. Бұл жүйе барлық бес мемлекетте және барлық тасымалдаушылар үшін міндетті түрде қолданылады», — деп нақтылады комиссия. Еуразиялық экономикалық комиссияның түсіндіруінше, алғашқы кезеңде навигациялық пломбалар акциздік және салықтық жүктемесі жоғары тауарларға қолданылады. Оларға алкоголь, темекі, никотин қосылған өнімдер, киім-кешек, аяқ киім және халық жиі тұтынатын басқа да тауарлар жатады. ЕЭК-тің кедендік ынтымақтастық мәселелері жөніндегі министрі Руслан Давыдов бұл шешімге қатысты былай деп пікір білдірді: «Бұл – тарихи шешім. Оның енгізілуі Еуразиялық экономикалық одақтың транзиттік әлеуетін арттыруға, тасымалдаушылар үшін қолайлы жағдай жасауға сеп болады деп үміттенеміз. Сонымен қатар, бізге аса маңыздысы – бақылаушы органдардың көліктерді негізсіз тоқтатуы азаяды деген сенім бар. Себебі навигациялық пломба арқылы тасымалдың ашықтығы толық қамтамасыз етіледі», – деді министр.
Евразия24 пікірі:
2024 жылдың қазан айында «Атамекен» ҰКП алаңында қазақстандық тасымалдаушылар ЕАЭО аясында навигациялық пломбаларды міндетті түрде енгізу бастамасын талқылаған еді. Бұл жүйенің негізгі мақсаты – контрабанда мен жол бойындағы тонау әрекеттерінің алдын алу. Алайда, бұл бастама тасымалдаушыларға қосымша шығын жүктейді: пломбаларды орнату, қызмет көрсету және шешу арзанға түспейді. Сондықтан, олардың қолданылуы нақты тиімділікке және кедендік рәсімдердің жеңілдеуіне алып келуі тиіс. Алайда сала өкілдерінің алаңдаушылығы әлі де бар. Халықаралық автотасымалдаушылар қауымдастығының айтуынша, Келісімде тек бақылау шараларын азайту қажеттігін атап өткен, бірақ транзиттің кедергісіз өтуі мен тексерулерден босату туралы ешқандай кепілдік бермейді (https://atameken.kz/ru/news/52645-navigacionnye-plomby-kak-mcriap-opredelil-tarify-i-chto-dumaet-kazahstanskij-biznes ). Бұл мәселені аталған жарияланымда ашық көрсеткен. Себебі бақылау – ЕАЭО-ға мүше елдердің кеден органдарының құзырындағы міндет, және бұл олардың шешіміне тәуелді. Осылайша, навигациялық пломбалар жүйесі толық іске қосылса да, тасымалдаушылар үшін басты түйткіл – негізсіз және шамадан тыс кедендік тексерулер – әлі де шешілмеген күйінде қалып отыр.
