ДУБАЙ. 26 қыркүйек. ИНТЕРФАКС – Ресей мен Иран Иран аумағында атом электр станциясын (АЭС) салуға қатысты 25 миллиард долларлық келісімшарт жасасты. Бұл туралы жұма күні ирандық Mehr агенттігі хабарлады.
«Ирандық Iran Hormoz компаниясы мен ресейлік Росатом мемлекеттік корпорациясы арасында Хормозган провинциясындағы Сирик қаласында үшінші буынға жататын төрт заманауи энергоблоктан тұратын АЭС салуға қатысты $25 млрд көлеміндегі келісімге қол қойылды», – делінген агенттік хабарламасында.
2025 жылғы 24 қыркүйекте Ресей мен Иран Иран аумағында шағын қуатты атом станцияларын салу бойынша ынтымақтастық жөніндегі өзара түсіністік туралы меморандумға да қол қойған. Құжат стратегиялық жобаны жүзеге асыруға бағытталған нақты іс-шараларды қамтиды.
Айта кетейік, бұған дейін Ресей Иранда «Бушер» АЭС жобасын жүзеге асырған. Оның алғашқы энергоблогы 1000 МВт қуатымен 2013 жылы ирандық тарапқа тапсырылған. 2016 жылы екінші кезектегі құрылысы басталған (II және III энергоблоктардың жиынтық қуаты – 2,1 мың МВт). II энергоблокты 2024 жылы, III энергоблокты 2026 жылы аяқтау жоспарланған.
2025 жылдың ақпан айының соңында Росатом басшысы Алексей Лихачев Ресей дизайны негізіндегі тағы бір АЭС салынатын жаңа алаң анықталғанын, алайда құрылыс жұмыстарының басталуына әлі уақыт қажет екенін мәлімдеген болатын.
