Мәскеу. 13 қазан. ИНТЕРФАКС – Нидерланд үкіметі жартылай өткізгіш компоненттер өндіретін, Қытайдың Wingtech Technology Co. компаниясына тиесілі Nexperia компаниясын бақылауына алды.
Үкімет мәлімдемесіне сәйкес, бұл шешім төтенше жағдай туындаған жағдайда Nexperia өнімдерінің қолжетімсіз болып қалу қаупінің алдын алу мақсатында қабылданды.
Автомобиль өнеркәсібі мен тұтынушылық электроника саласына арналған маңызды компоненттердің жеткізушісі болып саналатын компания өндірісін әдеттегі тәртіпте жалғастырады. Алайда Нидерланд билігі компания басшылығының шешімдерін тоқтата тұруға немесе күшін жоюға құқылы болады. Бұл – егер аталған шешімдер Nexperia-ның мүддесіне, оның голландиялық және еуропалық компания ретінде болашағына немесе өңірдегі жеткізу тізбегінің сақталуына қауіп төндіреді деп есептелсе, жүзеге асады.
Аталған жағдай Нидерландта «Тауарлардың қолжетімділігі туралы заң» (Goods Availability Act) алғаш рет қолданылып отырғанын көрсетті. Бұл заң 70 жылдан астам уақыт бұрын төтенше жағдайлар кезінде аса маңызды тауарлардың қолжетімділігін қамтамасыз ету үшін қабылданған болатын. Nexperia компаниясына қатысты осы заңның қолданылуына компания ішіндегі «басқарудағы елеулі проблемалар мен басқа да әрекеттерге қатысты алаңдатарлық белгілер» себеп болған.
«Аталған белгілер Нидерланд пен Еуропадағы негізгі технологиялық құзыреттер мен мүмкіндіктердің сақталуына қауіп төндіреді, ал олардың жоғалуы экономикалық қауіпсіздікке қатер төндіруі мүмкін», – делінген үкімет хабарламасында.
Сонымен қатар, Нидерланд билігі Wingtech компаниясынан Nexperia-ның активтері, бизнес шешімдері мен кадрлық құрамына қатысты кез келген өзгерістерді бір жылға тоқтата тұруды талап етті, деп хабарлайды қытайлық компания.
Wingtech компаниясы 2006 жылы келісімшарттық негізде электроника өндіруші ретінде құрылған. 2018 жылы ол Nexperia компаниясын 3,6 миллиард АҚШ долларына сатып алып, жартылай өткізгіш компоненттер өндіру қуатын иеленген.
