Астана. 13 қазан. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Мәжіліс Төрағасы Ерлан Қошановты қабылдады, деп хабарлайды Мемлекет басшысының баспасөз қызметі.
Кездесу барысында Ерлан Қошанов Мәжілістің қазіргі қызметі туралы ақпарат берді. Хабарламаға сәйкес, қазіргі уақытта Мәжіліс 15 заңды қабылдап, Сенатқа жолдаған. Палата қарауында 77 заң жобасы бар.
Мәжіліс спикерінің айтуынша, биылғы жылдың соңына дейін «Құрылыс кодексі», «Цифрлық кодекс» және «Банк қызметі туралы» заң қабылданбақ. Сондай-ақ сайлау туралы, тұтынушылардың құқықтарын қорғау және құқықбұзушылықтардың алдын алу мәселелері бойынша заң жобалары әзірленуде.
Сонымен қатар, Қошанов депутаттардың Мемлекет басшысының жасанды интеллектті дамыту жөніндегі бастамаларын іске асыру бағытында белсенді жұмыс жүргізіп жатқанын баяндады. Ол сондай-ақ парламентаралық дипломатия аясында атқарылған жұмыстардың нәтижелері туралы да хабардар етті.
