Астана. 13 қазан. ИНТЕРФАКС-ҚАЗАҚСТАН – Қазақстан Премьер-министрі Олжас Бектенов Zijin Mining Group компаниясының төрағасы Чэнь Цзиньхэмен кездесу өткізді. Кездесу барысында тау-кен металлургия кешеніндегі (ТМК) инвестициялық ынтымақтастық мәселелері қаралды, деп хабарлайды ҚР Үкіметінің баспасөз қызметі.
Үкіметтің мәліметінше, тараптар Ақмола облысында ТМК саласындағы ірі инвестициялық жобаны іске асыруға бағытталған бірлескен шараларды талқылады. Сонымен қатар геологиялық барлау саласындағы және жаңа кен орындарының әлеуетін игеру бағытындағы өзара тиімді серіктестік перспективалары атап өтілді.
Премьер-министр Қазақстан Үкіметі жоғары қосылған құны бар инвестициялық жобаларды жүзеге асыруға жан-жақты қолдау көрсетуге дайын екенін жеткізді. «Серіктестік пайдалы қазбаларды өндіру көлемін ұлғайтуға, тұрақты жұмыс орындарын құруға және озық, экологиялық тұрғыдан орнықты өндіріс технологияларын енгізуге ықпал етуі тиіс», – делінген хабарламада.
Өз кезегінде Zijin Mining Group директорлар кеңесінің төрағасы Чэнь Цзиньхэ Қазақстанда инвестициялар үшін қолайлы жағдайлар жасауға бағытталған жұмыстарды жоғары бағалап, республикамен ынтымақтастықты нығайтуға мүдделілік білдірді.
Еске сала кетейік, дүйсенбі күні «Верный Капитал» компаниялар тобы мен оның стратегиялық серіктесі – америкалық Resource Capital Funds (RCF) инвестициялық қоры RG Gold алтын өндіруші компаниясын Zijin Mining Group Co. Ltd. корпорациясының еншілес кәсіпорны – Zijin Gold International Co. Ltd. компаниясына сату мәмілені аяқтаған болатын. Маусым айының соңында Қытайдың ең ірі алтын өндірушісі Zijin Mining Ақмола облысындағы Райгородок кен орнын игеріп жатқан қазақстандық RG Gold компаниясын 1,2 миллиард АҚШ долларына сатып алу жөнінде келісімге қол қойғаны хабарланған.
Zijin Mining Group – металлургия саласындағы әлемдегі ең ірі компаниялардың бірі. Бүгінде 15 елде 30 жобаны жүзеге асыруда. Тау-кен өнеркәсібіндегі бұл конгломерат Forbes Global 2000 тізімінде 778-орында, ал Fortune China 500 рейтингінде 77-орында тұр. Компанияның акциялары Гонконг пен Шанхай қор биржаларында саудаланады.
Қазақстан алтын өндіру көлемі бойынша әлемде 6-орында, ал алтын қоры бойынша 13-орында. Қазіргі уақытта тау-кен металлургия саласының Қазақстан ЖІӨ-дегі үлесі – 8%, жылдық металлургиялық өнім өндірісі – 14 трлн теңгеден асады. Салада шамамен 224 мың адам жұмыс істейді. Өткен жылы бұл секторға 3 млрд АҚШ доллары көлемінде инвестиция тартылды.
