Tengrinews.kz хабарлайды: «Ішкі істер министрлігі ел аумағында алкоголь өнімдерінің саудасына қатысты бірқатар шектеу шараларын ұсынды. Бұл туралы Үкімет сағатында ведомство басшысы Ержан Саденов мәлімдеді. Саденовтің айтуынша, алкоголь — елдегі қылмыс деңгейіне тікелей ықпал ететін негізгі факторлардың бірі. Жыл сайын мас күйінде жасалатын құқық бұзушылықтар саны 10 мыңға дейін жетеді. Профилактикалық шаралар туралы айта келе, ІІМ өкілдері бұл жұмысты тек салдарымен күрес екенін атап өтті. Олардың пайымынша, пайда табуды көздейтін кейбір кәсіпкерлер спирттік ішімдіктерді сату кезінде жас ерекшелігі мен уақыт шектеулерін жиі бұзады. Көп жағдайда бұл қызмет дәмхана немесе бар ретінде тіркеліп, тәулік бойы жүзеге асырылады. Сонымен қатар онлайн жеткізу әдісі кеңінен қолданылып отыр. «Лицензиядан айыру шарасы да тиімді болмай тұр. Себебі келесі күні бұл рұқсат басқа тұлғалар атына қайта рәсімделуі мүмкін», — деді министр. Осыған байланысты ІІМ интернет арқылы алкоголь өнімдерін сатуға толықтай тыйым салуды, сондай-ақ спирттік ішімдіктерді тек арнайы мамандандырылған дүкендерде (яғни алкомаркеттерде) сатуды ұсынды. Бұған қоса, лицензия беру тәртібін қатаңдатып, олардың санын шектеу қажет деп санайды».
Евразия24 пікірі:
ІІМ алкоголь өнімдерінің сатылымына шектеу қою бастамасын қоғамдағы қылмыс деңгейімен байланыстырып отыр. Алайда Бас прокуратураның ресми статистикасы мүлде басқа үрдісті көрсетеді: 2022 жылдан бері Қазақстанда алкогольдік мас күйінде жасалатын қылмыстар саны тұрақты түрде азайып келеді. Мысалы, 2022 жылдың қаңтар–тамыз айларында мұндай 5,3 мың қылмыс тіркелсе (оның 2 мыңы – ауыр және аса ауыр), 2024 жылы — 4,8 мың (1,7 мың), ал 2025 жылы бұл көрсеткіш 4,2 мыңға дейін төмендеген (оның 1,5 мыңы – ауыр және аса ауыр). Қылмыс деңгейі әлі де жоғары болғанымен, оң динамика бар. Осыған байланысты ІІМ бастамасы статистикалық мәліметтермен толық негізделмегендей әсер қалдырады. Бұл ретте алкоголь тұтыну мен елдегі әлеуметтік-экономикалық жағдай арасындағы байланысты зерттеу орынды болар еді. Егер ғылыми тұрғыдан қарастырсақ, қазақстандықтардың ішімдікке жиі жүгінуі үмітсіздік пен күйзелістің салдары болуы мүмкін. Мұндай жағдайда мемлекет тарапынан бұл мәселеге кешенді тәсіл қажет екені айқын болмақ.
