Еуразиялық экономикалық комиссия (ЕЭК) хабарлайды: ЮНКТАД (БҰҰ-ның Сауда және даму жөніндегі конференциясы) халықаралық экономикалық жүйені ашық өңірлік ынтымақтастық қағидаттары негізінде қайта қалыптастыру ісінде маңызды рөл атқарады. Бұл туралы ЕЭК сауда жөніндегі министрі Андрей Слепнев Женевада (Швейцария) өткен ЮНКТАД-тың он алтыншы сессиясындағы жалпы пікірталаста мәлімдеді. «Еуразиялық экономикалық одақ – жоғары деңгейде ықпалдасқан, ашық бірлестік. Ашық өңірлік ынтымақтастық өзара нарықтарды, капитал мен еңбек ресурстарын, инновациялар мен инфрақұрылымды біріктіру арқылы жаңа даму тетіктерін қалыптастырып келеді», — деді министр. Андрей Слепнев климаттың өзгеруіне қарсы күрес пен ұлттық әлеуметтік-экономикалық мақсаттарды жүзеге асыру арасындағы теңгерімді сақтаудың маңыздылығын атап өтті. Оның айтуынша, бұл бағытта «төмен көміртекті және өтпелі отын түрлерін қамтитын үздік қолжетімді технологияларды кеңінен және кемсітусіз пайдалану, сондай-ақ халықаралық тәжірибе алмасуды кеңейту аса маңызды». «Кедендік реттеу, сауда рәсімдерін жеңілдету, цифрлық таңбалау мен тауарларды қадағалау тетіктерін енгізу мәселелерінде перспективалы цифрлық технологияларды ілгерілету үшін ЮНКТАД алаңы аясындағы белсенді өзара іс-қимылды жалғастыруға ниеттіміз», — деп түйіндеді ЕЭК өкілі.
Евразия24 пікірі:
Еуропа жаңа антиресейлік және қосалқы санкциялар енгізіп жатқан кезде, Еуразиялық экономикалық комиссия (ЕЭК) БҰҰ алаңында әлем елдерімен сауда диалогын табысты жалғастырып келеді. Әлемдік экономиканың белсенді бөлігі тарихта ешбір соғыс не саяси қақтығыс сауда қатынастарын толық тоқтата алмағанын жақсы түсінеді. Себебі кез келген парасатты мемлекет үшін ең алдымен маңыздысы – өз ұлттық мүддесі, ал одан кейін барып саяси немесе экономикалық бәсекелестерге қарсы ұжымдық науқандар тұрады. Бұл тұрғыдан алғанда, ұзақ мерзімді серіктестерді дұрыс таңдай білудің жарқын үлгісі – БРИКС бірлестігі. Жарғысы мен штаб-пәтері жоқ бейресми ұйым бастапқыда төрт мемлекеттен құралған еді, бүгінде оның тұрақты мүшелерінің саны онға жетіп отыр. Сарапшылардың бағалауынша, 2030 жылға қарай БРИКС елдері әлемдік сауданың ширегін иеленуі мүмкін. Осы ретте Еуразиялық экономикалық одақтың да бағыт алатын үлгісі бар деуге болады.
