ВАШИНГТОН. 12 қыркүйек. ИНТЕРФАКС – Йемендік хуситтер Баб-эль-Мандеб бұғазының қақ ортасында орналасқан стратегиялық маңызы бар Перим аралын бақылауына алды. Бұл туралы CNN Йемен үкіметіндегі дереккөздерге сілтеме жасап хабарлады.
Телеарна мәліметінше, аралдың хуситтер бақылауына өтуі оларға әлемдік теңіз саудасының аса маңызды бағыттарының біріне толық бақылау орнатуға мүмкіндік береді. Бұл бұғаз арқылы күн сайын миллиондаған баррель мұнайды қоса алғанда, орасан көлемде жүк тасымалданады.
Жұма күні «Әл-Арабия» телеарнасы Иран қолдайтын хуситтердің Йемен үкіметі күштеріне қарсы операция барысында Қызыл теңіз жағалауындағы ел аумағын Баб-эль-Мандеб бұғазына дейін түгелдей бақылауына алғанын хабарлаған еді. Олардың қолына Моха және Дубаб портты қалалары мен Мурад елді мекені де өткен.
«Ансар Аллах» қозғалысының (хуситтер) әскери өкілі Яхья Сари жұма күні Йемен маңындағы теңіз жолдарымен Сауд Арабиясына қатысы бар кемелерден басқасының еркін жүре алатынын мәлімдеді.
Оның айтуынша, Сауд Арабиясы хуситтер бақылауындағы аумақтарға қойылған блокаданы тоқтатпайынша, қозғалыс теңіздегі қоршауды жалғастырып, әскери қимылдар мен Сауд Арабиясы нысандарына шабуылдарды тоқтатпайды.
Яхья Сари Таиз және Ходейда провинцияларындағы соңғы шабуылдар кезінде хуситтер 5,4 мың шаршы шақырым аумақты бақылауына алғанын да айтты.
