ДЕЛИ. 12 қыркүйек. ИНТЕРФАКС – БҰҰ Қауіпсіздік кеңесінің құрамына Азия, Африка және Латын Америкасы елдерінің өкілдерін көбірек тарту ұйым жұмысының тиімділігін арттыруға мүмкіндік береді. Ресей президенті Владимир Путин БРИКС саммитінде осындай пікір білдірді.
«БРИКС-тегі пікірлес елдермен бірлесіп, БҰҰ қызметінің тиімділігін арттыруға әрі қарай да атсалысу қажет деп санаймыз. Бұл тұрғыда Қауіпсіздік кеңесінің құрамын кеңейтіп, Азия, Африка және Латын Америкасы елдерінің өкілдігін арттыру маңызды», – деді Путин.
Ресей президентінің айтуынша, көпполярлы әлемнің қалыптасуы бірқатар кедергіге тап болып отыр. Ол мұны әлі де отаршылдық түсініктен арыла алмай, әлемді «гүлденген бақ» пен «жабайы джунглиге» бөліп қарайтын әрі өзгенің есебінен өмір сүруге үйренген күштердің қарсылығымен байланыстырды.
«Олар өзгеріп жатқан жағдайды қабылдауға дайын емес және күшейіп келе жатқан бәсекелестерін түрлі жолмен тежеуге тырысады. Бұл үшін тарифтік соғыстар, заңсыз санкциялар, экономикалық қысым мен бопсалау, өзге елдердің ішкі ісіне араласу, тіпті ашық күш қолдануға дейінгі амалдар пайдаланылып отыр», – деді ол.
Путиннің сөзінше, бұрыннан келе жатқан шиеленіс ошақтары қайта өршіп, жаңа қақтығыстар мен келіспеушіліктер туындап жатыр. Соның салдарынан халықаралық қатынастар жүйесінің қалыпты жұмысы бұзылып, бірқатар көпжақты ұйымдар мен институттардың ықпалы әлсіреген.
Осыған байланысты Ресей БҰҰ-ның әлемдік саясаттағы негізгі орнын сақтап, оның рөлін күшейтуге айрықша мән береді.
«БҰҰ Жарғысы – халықаралық құқықтың басты негіздерінің бірі. Кейбір мемлекеттер оны кім және қалай жасағаны түсініксіз әлдебір ережелерге негізделген тәртіппен алмастыруға тырысып жатқанына қарамастан, оның маңызы өзгермейді», – деді Ресей президенті.
