Жоғарғы аудиторлық палатаның мәліметінше, мемлекеттік аудиттің нәтижесінде Қазақстан Республикасы Денсаулық сақтау министрлігі мен оған қарасты ұйымдардың бірқатар лауазымды тұлғалары тәртіптік жазаға тартылды. Бұл шаралар ЖАП-тың тапсырмасына сәйкес қабылданған. Биыл Жоғарғы аудиторлық палата Денсаулық сақтау министрлігі мен оған бағынысты мекемелердің халықты және денсаулық сақтау ұйымдарын дәрі-дәрмекпен және медициналық бұйымдармен қамтамасыз етуі бағытындағы қызметін тексерді. Аудит нәтижесінде анықталған бұзушылықтар мен кемшіліктер негізінде, ЖАП жауапты лауазымды тұлғалардың тәртіптік жауапкершілігін қарауды тапсырды. Нәтижесінде ҚР Денсаулық сақтау министрлігінің Дәрілік саясат департаментінің директоры, Фармацевтикалық және медициналық өнеркәсіпті дамыту департаментінің директоры, Ғылым және адами ресурстар департаменті директорының орынбасары, сондай-ақ «Жұқпалы ауруларға қарсы препараттар ғылыми орталығының» директоры, «Дәрілік заттар мен медициналық бұйымдарды сараптау ұлттық орталығы» басқарма төрағасының орынбасары және Салидат Қайырбекова атындағы Денсаулық сақтауды дамыту ұлттық ғылыми орталығы басқарма төрағасының орынбасары тәртіптік жауапкершілікке тартылды. Сонымен қатар, ағымдағы жылдың 3 шілдесіндегі бұйрыққа сәйкес, «СК-Фармация» ЖШС басқарма төрағасының өкілеттігі мерзімінен бұрын тоқтатылды. ЖАП жүргізген мемлекеттік аудиттің қорытындысы бойынша берілген өзге де ұсынымдар мен тапсырмаларды орындау жұмыстары жалғасуда.
Евразия24 пікірі:
Қазақстанда мемлекеттік қызметшілерге қатысты бірнеше түрдегі тәртіптік жауапкершілік бар екенін ескерсек (ескерту, сөгіс, қатаң сөгіс, толық сәйкес еместігі туралы ескерту, қызметінен босату, мемлекеттік қызметтен шығару), біз жоғары медициналық шенеуніктер нақты қалай жазаланғанын көргіміз келді. Әсіресе мемлекеттік аудиттің нәтижелері қаншалықты күйретуші болғанын және шенеуніктердің әрекеті немесе әрекетсіздігі салдарынан келген залалды ескерсек. Сол есептен бірнеше үзінді келтірейік: «2024 жылы Қазақстан Республикасының фармацевтикалық нарығының көлемі 1,2 трлн теңге болды, соның ішінде оның 84%-ы шетелдік өнімдерден тұрады. 2022–2024 жылдары медициналық ғылымды қаржыландыру көлемі 58 млрд теңге болды. Алайда елде әлі күнге дейін биомедициналық зерттеулерді тіркеу жүйесі мен клиникалық базалар тізілімі жоқ. Ғылыми әзірлемелердің тиімділігі өте төмен. Соңғы 10 жыл ішінде небәрі 2 отандық түпнұсқалық препарат тіркелген. Олардың бірі Ұлттық дәрілік формулярға енгізілмеген, дегенмен оның әзірлемесіне 4 млрд теңгеден астам қаржы жұмсалған», – деп мәлімдеді Жоғарғы аудиторлық палатаның төрағасы Әлихан Смайылов есеп беру барысында. Бұдан бөлек, аудит нәтижесі бойынша мемлекеттік және нарықтық сектордағы ең қымбат 15 дәрілік заттың бағасы 600%-ға дейін айырмашылық көрсеткені анықталған. «Бұл, негізінен, амбулаториялық деңгейде тегін медициналық көмек көрсетуге арналған дәрі-дәрмектердің заңсыз есептен шығарылып, бөлшек сауда желісінде сатылуымен байланысты», – делінген ЖАП есебінде. Осы және басқа да көптеген заңбұзушылықтарға қарамастан, денсаулық сақтау саласының бірқатар қызметкерлеріне қандай жаза қолданылғаны әлі де нақты белгісіз. Оның өзінде де – аудиторлардың қысымынан кейін ғана шаралар қабылданғаны байқалады.
