АСТАНА. 11 қараша. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Ресеймен көлік және логистика саласындағы өзара іс-қимылды кеңейтуді ерекше стратегиялық маңызды іс деп атады.
Бұл пікірін Мемлекет басшысы Мәскеуге мемлекеттік сапары қарсаңында «Российская газета» басылымында жарияланған «Мәңгілік достық – халықтарымыз үшін бағыт-бағдар» атты авторлық мақаласында білдірді.
Президент өз мақаласында Қазақстан аумағынан 13 халықаралық көлік дәлізі өтетінін, оның ішінде бесі – теміржол, сегізі – автокөлік бағыты екенін еске салды. Бұл дәліздер Азия мен Еуропа арасындағы құрлықтағы жүк тасымалының шамамен 85%-ын қамтамасыз етіп отыр.
«Қазақстан мен Ресейдің ауқымды аумағы мен географиялық орналасуын ескере отырып, транзиттік бағыттарды және оған қажетті инфрақұрылымды дамыту – бүкіл Еуразияның көлік байланысын қамтамасыз етуде аса маңызды міндет. Осы мақсатта екі ел “Батыс Еуропа – Батыс Қытай” халықаралық автокөлік дәлізінің өткізу қабілетін арттыру және Қазақстан мен Ресей шекарасындағы 30 автокөлік өткізу пунктін жаңғырту бағытында бірлесіп жұмыс жүргізуде», – деді Тоқаев.
Сонымен қатар, Президент «Солтүстік – Оңтүстік» көлік дәлізінің шығыс тармағын дамытуға Қазақстан мен Ресей тарапынан нақты қадамдар жасалып жатқанын атап өтті. Бұл бағытта жүк тасымалы көлемінің айтарлықтай артқаны байқалуда.
«Аталған үдерісте Ресей – Қазақстан – Түрікменстан – Иран теміржолының рөлі айрықша. Осы бағыттың өткізу қабілетін алдағы бес жылда жылына 20 миллион тоннаға дейін жеткізуге мүмкіндік беретін жол картасына қол қойылды», – деп жазды Мемлекет басшысы.
