АСТАНА. 13 қараша. ИНТЕРФАКС-ҚАЗАҚСТАН – Бүгін Сенаттың жалпы отырысында Қазақстан мен Түрікменстан үкіметтері арасындағы қылмыспен күрестегі әріптестік туралы келісімді ратификациялау жөніндегі заң қабылданып, Мемлекет басшысының қол қоюына жолданды.
Келісім екі ел арасындағы қылмыспен күрестегі өзара іс-қимылды күшейтіп, азаматтардың құқықтары мен еркіндігін қорғауды қамтамасыз етуге бағытталған.
Құжатта ұйымдасқан қылмыс, терроризм мен экстремизм, олардың қаржыландырылуы, есірткі мен қару айналымы, заңсыз көші-қон, адам саудасы, сондай-ақ сыбайлас жемқорлық, экономикалық және киберқылмыстарға қарсы күрес бойынша бірлескен іс-шаралар көзделген.
Ынтымақтастық шеңберінде тараптар жедел және криминалистикалық ақпаратпен алмасып, мамандар арасында тәжірибе алмасуға, құқық қорғау органдарының сұрауларына жедел әрекет етуге уағдаласты.
Келісімде алынған ақпаратты құпия сақтау тәртібі, сұрауды орындаудан бас тарту жағдайлары, сондай-ақ келісімді өзгерту және тоқтату рәсімдері де нақты көрсетілген.
Айта кетейік, Қазақстан осыған ұқсас келісімдерді Болгария, Венгрия, Италия, Қытай, Сауд Арабиясы, Түркия, Өзбекстан, Франция, Біріккен Араб Әмірліктері сынды 20-дан астам елмен бекіткен.
