Астана. 16 қараша. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев жаһандық геосаяси тұрақсыздық жағдайында өңірлік тұрақтылық пен қауіпсіздікті нығайтуда Орталық Азия мемлекеттері Қауіпсіздік кеңестері хатшыларының жұмысы айрықша маңызды екенін айтты, деп хабарлайды Мемлекет басшысының баспасөз қызметі.
Президенттің пікірінше, өңір терроризм, діни экстремизм, есірткі айналымы және трансұлттық қылмыс сияқты сын-қатерлермен бетпе-бет келіп отыр. Бұл қауіп-қатерлерге тиімді қарсы тұру үшін Орталық Азия мемлекеттері келісілген ортақ ұстанымда жұмыс істеуі қажет. Мемлекет басшысы бұл бағыттағы негізгі жұмыстар қауіпсіздік кеңестерінің хатшылары деңгейінде жүргізілуі тиіс екенін атап өтті.
Сонымен қатар Қасым-Жомарт Тоқаев Тәжікстан мен Қырғызстан арасындағы мемлекеттік шекара туралы келісімдерге, сондай-ақ Қырғызстан, Тәжікстан және Өзбекстан шекараларының түйісу нүктесіне қатысты уағдаластықтарға оң баға беріп, мұны өңірлік тұрақтылықты нығайту жолындағы маңызды қадамдар ретінде атады. Ол сондай-ақ Тәжікстанның «XXI ғасырдағы достық туралы шартқа» қол қоюының маңыздылығына тоқталды.
Кездесу барысында Президент Консультативтік кездесулер форматын одан әрі жетілдіру мәселелеріне де назар аударды. Оның айтуынша, Ұлттық үйлестірушілер кеңесі құрылғаннан бері өз тиімділігін көрсетіп келеді. Осы ретте Тоқаев бұл кеңестің рөлін өңір дамуының стратегиялық бағыттарын әзірлеу құзыретімен кеңейту қажет деп есептейтінін айтты.
Президент сондай-ақ Өзбекстан басшысы Шавкат Мирзиёевтің Консультативтік форматтың институционалдық негізін күшейту жөніндегі ұсыныстарына қолдау білдірді. Бұл ұсыныстарды Орталық Азия мемлекеттері жұмыс тәртібі аясында пысықтап, нақты шешімдер қабылдауға болатынын атап өтті.
Сөз соңында Мемлекет басшысы Орталық Азия сараптамалық форумын өңірлік ынтымақтастық жүйесіне қосып, оны бірлескен зерттеулер жүргізіп, ортақ көзқарастар қалыптастыратын негізгі алаңға айналдыруды ұсынды.
