Астана. 16 қараша. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Ташкентте өткен Орталық Азия мемлекеттері басшыларының VII Консультативтік кездесуінде сөз сөйлей отырып, өңір елдеріне жасанды интеллектіні (ЖИ) жауапты әрі қауіпсіз пайдалану жөніндегі ортақ декларацияны әзірлеуді ұсынды.
«Жасанды интеллект саласындағы әріптестікті одан әрі дамыту үшін бұл технологияны пайдалану бойынша бірыңғай стандарттар қабылдау маңызды. Осыған байланысты Орталық Азия елдері арасында Жасанды интеллектіні жауапты пайдалану жөніндегі Декларацияны әзірлеуді ұсынамыз», – деді Мемлекет басшысы.
Мемлекет басшысының айтуынша, бұл құжат бірлескен цифрлық жобалар аясында деректермен алмасудың ашықтығы мен сенімділігін, сондай-ақ қауіпсіздігін қамтамасыз етіп, барлық қатысушылардың құқықтарын қорғаудың нақты кепілі бола алады.
