Астана. 16 қараша. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Орталық Азияның көлік инфрақұрылымын үйлесімді дамыту мақсатында өңір елдерімен бірлесіп кешенді стратегия әзірлеуді ұсынды.
«Шекарадан өту кезінде тексерістердің қайталануына, артық бюрократиялық рәсімдерге жол бермеу үшін Бірыңғай электронды жүк алып жүру жүйесін енгізу мәселесін қарастыру орынды деп санаймыз. Өңір әлеуетін одан әрі нығайту үшін Орталық Азия көлік жүйесін дамытуға арналған Кешенді стратегия әзірлеуді бастау қажет», – деді Мемлекет басшысы Ташкентте өткен Орталық Азия елдері басшыларының VII Консультативтік кездесуінде.
Президенттің пікірінше, қазіргі жаһандық өзгерістер жағдайында Орталық Азия елдерінің аймақты Еуразиядағы басты транзиттік торапқа айналдыру мүмкіндігі бар. «Бірақ бұл үшін тек үйлесімді және ортақ қадамдар ғана нәтижелі болмақ», – деді ол.
Қасым-Жомарт Тоқаев шекара маңында құрылып жатқан өндірістік хабтар ерекше мүмкіндіктерге жол ашатынын атап өтті.
«Оларды әрі қарай дамыту аясында жоғары технологиялы жобаларды іске қосуға назар аударуымыз қажет», – деді Президент.
Мемлекет басшысы өңірлік экономикалық ынтымақтастықты нығайту бағытында айтарлықтай жетістіктерге қол жеткізілгенін де айтты.
«Бірлескен кәсіпорындар саны артып келеді, өнеркәсіп, энергетика, машина жасау, агроөнеркәсіп кешені және өзге де салаларда ауқымды жобалар іске асырылып жатыр. Сауда кедергілері жүйелі түрде жойылуда, жаңа өткізу пункттері ашылуда, авто және теміржол қатынасы кеңейіп келеді. Соның нәтижесінде өткен жылы өңіраралық сауда көлемі 11,5 миллиард АҚШ долларына жетті. Бұл оң үрдісті барынша қолдап, алдағы уақытта бұл көрсеткішті 20 миллиард долларға дейін жеткіземіз деп ойлаймын», – деді Тоқаев.
Президент болашағы зор салаларда серпінді жобаларды іске қосуға шақырды. Қазақстан бұл бағыттағы өзара тиімді әріптестікке дайын екенін жеткізді. Атап айтқанда:
•астық, майлы дақылдар мен ет-сүт өнімдерін терең өңдеу бойынша бірлескен кәсіпорындар құру;
•мал шаруашылығы мен органикалық егіншілікті дамыту;
•заманауи қоймалар, логистикалық орталықтар мен дайын азық-түлік өнімдерін өндіретін кешендер салу.
Олар ішкі сұранысты қамтамасыз етіп қана қоймай, экспорттық әлеуетті де арттыруға мүмкіндік береді.
