ДУБАЙ. 4 желтоқсан. ИНТЕРФАКС – Ирактың Әділет министрлігі «Хезболла» қозғалысы мен хуситтерді террористік ұйымдар тізіміне енгізіп, олардың активтерін бұғаттау жөніндегі шешімін ресми түрде күшіне енгізді. Бұл туралы бейсенбі күні The National басылымы хабарлады.
Ирактың Орталық банкінің терроризмді қаржыландыру мен ақшаны жылыстатуға қарсы күрес басқармасының мәліметінше, билік енді тізімге енген ұйымдардың жылжымайтын және жылжымалы мүлкін, сондай-ақ қаржы активтерін бұғаттайды.
Басқарма «Хезболла» мен хуситтердің лаңкестік әрекеттерге қатысы бар екенін атап өтсе де, нақты егжей-тегжейін жариялаған жоқ.
2023 жылдың қараша айында Ливанның Орталық банкі де қаржы операцияларына бақылауды күшейту туралы шешім қабылдап, оның мақсаты – экстремистік топтардың, соның ішінде «Хезболланың» қаржыландырылуына тосқауыл қою екені айтылған.
Бұған дейін LBCI телеарнасы америкалық делегацияның Ливанға келіп, Бейрут билігіне «Хезболланың» қаржылық және әскери мүмкіндіктерін шектеуге бағытталған шараларды екі ай ішінде қабылдау қажеттігін мәлімдегенін хабарлаған. АҚШ тарапынан қойылған негізгі талаптардың бірі – «Хезболланы» қаржыландырумен айналысатын «Кард аль-Хасан» ұйымының қызметін тоқтату болған.
