ЛОНДОН. 5 желтоқсан. ИНТЕРФАКС – Канада әуе шабуылдарына арналған оқ-дәрілерді АҚШ-тан 4 миллиард долларға сатып алмақ. Бұл жөнінде жұма күні The Globe and Mail басылымы хабарлады.
Канада Қарулы Күштері атынан сөйлеген Қорғаныс министрлігінің өкілі Андре-Анн Паулиннің айтуынша, ел Әскери-әуе күштері JDAM басқарылатын бомбалары мен GBU-39 дәл бағытталатын авиабомбаларын АҚШ-тың шетелдік әскери сатып алу бағдарламасы арқылы алуды жоспарлап отыр.
Басылымның мәліметінше, бұл бомбаларды Канада 2026 жылдан бастап АҚШ-тан қабылдап алатын CF-18 және F-35 жойғыш ұшақтары, сондай-ақ MQ-9B ұшқышсыз ұшу аппараттары мен P-8 Poseidon патрульдік қарсы сүңгуір қайық ұшақтары тасымалдай алады.
Қару-жарақтың негізгі жеткізушілері ретінде Boeing және RTX компаниялары көрсетілген.
АҚШ Мемлекеттік департаменті бұл келісім Канадаға өңірлік қауіп-қатерге төтеп беру қабілетін арттыруға, АҚШ Қарулы күштерімен өзара әрекеттестікті қамтамасыз етуге, сондай-ақ бүкіл Солтүстік Америка құрлығының қорғаныс жүйесіне үлес қосуға мүмкіндік береді деп мәлімдеді.
The Globe and Mail деректеріне сүйенсек, Канада АҚШ-қа тәуелділікті азайтқысы келгенімен, қазіргі кезде елдің қару-жарақ сатып алуының шамамен 75%-ы америкалық өндірушілерден жүзеге асады. Сонымен қатар, Оттава АҚШ президенті Дональд Трамп әкімшілігінің саясатына байланысты F-35 жойғыштарына қатысты сатып алу көлемін қайта қарастырып жатыр.
