АСТАНА. 6 желтоқсан. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Қырғыз Республикасының Президенті Садыр Жапаровпен телефон арқылы сөйлесті, деп хабарлайды Мемлекет басшысының баспасөз қызметі.
Әңгіме барысында мемлекет басшылары екіжақты ынтымақтастықтың жоғары деңгейде дамып келе жатқанын атап өтіп, биылғы 21–22 тамызда Қасым-Жомарт Тоқаевтың Қырғыз Республикасына жасаған ресми сапары аясында қол жеткізілген келісімдердің орындалу барысын талқылады.
Қасым-Жомарт Тоқаев Садыр Жапаровты туған күнімен құттықтап, бауырлас қырғыз халқының игілігі жолындағы мемлекеттік қызметіне табыс тіледі.
Президент Тоқаев Қырғызстан Президентінің екі ел арасындағы көпқырлы ынтымақтастықты достық, тату көршілік және өзара қолдау рухында дамытуға қосқан елеулі жеке үлесін жоғары бағалайтынын атап өтті, деп мәлімдеді баспасөз қызметі.
