Мадрид. 6 желтоқсан. ИНТЕРФАКС-ҚАЗАҚСТАН – Венесуэла президенті Николас Мадуро аймақтағы қылмыстық топтарға қарсы күрес жүргізу мақсатында көршілес мемлекеттерге азаматтардың қауіпсіздігін қамтамасыз ету бойынша бірлескен операциялар өткізуге ұсыныс жасады.
«Венесуэла жоғары деңгейде даярлықтан өткен кәсіби полиция жүйесін құрды. Бұл – басқа елдерге үлгі бола алатын тәжірибе. Қалаған жағдайда, көршілес мемлекеттер осы құрылыммен бірлескен операциялар мен ақпарат алмасу жөнінде келісімдер жасай алады», – деді Мадуро ЭФЭ агенттігіне берген сұхбатында.
Оның айтуынша, Венесуэлада «Трен-де-Арагуа» және «Трен-де-Льяно» топтары, сондай-ақ АҚШ террористік ұйымдар тізіміне енгізген қылмыстық беделдер Вилексис Асеведо мен Карлос Реветтені қоса алғанда, барлық ірі қылмыстық ұйымдардың жолы кесілген.
«Біз Венесуэланы заңның күшімен азат еттік. Бұл – қылмыстық топтармен, халықаралық ұйымдасқан қылмыспен және есірткі айналымымен күрестегі үлкен жетістік», – деп атап өтті мемлекет басшысы.
