Вашингтон. 6 желтоқсан. ИНТЕРФАКС-ҚАЗАҚСТАН – АҚШ президентінің арнайы өкілі Стив Уиткофф пен Джаред Кушнердің Украина Қауіпсіздік және қорғаныс кеңесінің хатшысы Рустем Умеров және Украина Қарулы күштері Бас штабының бастығы Андрей Гнатовпен Майамиде өткен екі күндік келіссөздері айтарлықтай нәтиже әкелген жоқ, деп хабарлайды Bloomberg агенттігі.
АҚШ Мемлекеттік департаменті келіссөздерге қатысты «пікір алмасу сындарлы өтті» деген қысқаша мәлімдеме таратты.
Алайда Bloomberg дерегінше, «консультациялардағы оң өзгерістерге қарамастан, тараптар арасындағы келіссөздерде жаңа серпін беретіндей айтарлықтай ілгерілеу байқалмады».
Соған қарамастан, агенттік тараптардың қауіпсіздік шаралары мен тұрақты бейбітшілікті қамтамасыз ету үшін қажетті тежеу құралдары бойынша жалпы тұжырымдамалық түсіністікке келгенін жағымды нәтиже ретінде атап өтеді.
Мемлекеттік департамент хабарлауынша, екі тарап «Ресей тарапынан ұзақмерзімді бейбітшілікке байыпты түрде бейілділік танытуы – оның ішінде деэскалация бағытында нақты қадамдар жасауы – кез келген келісімге қол жеткізу үшін басты шарт екенін» мойындады.
Келіссөздер сенбі күні жалғасатын болып келісілді.
