Астана. 8 желтоқсан. ИНТЕРФАКС-ҚАЗАҚСТАН – Қазақстан Республикасының Президенті Қасым-Жомарт Тоқаев пен Палестина Мемлекетінің Президенті Махмуд Аббас телефон арқылы сөйлесу барысында екіжақты ынтымақтастықтың даму келешегін, сондай-ақ халықаралық ұйымдар мен көпжақты алаңдар аясындағы өзара іс-қимыл мәселелерін талқылады. Бұл туралы дүйсенбі күні мемлекет басшысының баспасөз қызметі хабарлады.
Кездесу барысында тараптар саяси диалогты одан әрі нығайту, сауда-экономикалық байланыстарды кеңейту, мәдени-гуманитарлық саладағы серіктестікті дамыту бағыттарын, сондай-ақ халықаралық және өңірлік құрылымдар шеңберіндегі өзара ықпалдастықты қарастырды.
Сонымен бірге президенттер халықаралық күн тәртібіндегі өзекті мәселелер бойынша пікір алмасты. Әсіресе Таяу Шығыстағы ахуалды реттеу мәселесіне ерекше назар аударылды.
Қазақстан Президенті өңірде ұзақ мерзімді бейбітшілік пен тұрақтылық орнатуға бағытталған халықаралық бастамаларды қолдайтынын атап өтіп, бұл үдеріс «екі халық үшін екі мемлекет» қағидатына негізделуі тиіс екенін мәлімдеді.
Палестина Президенті Қасым-Жомарт Тоқаевқа Палестина мемлекеті мен халқына көрсетіліп келе жатқан тұрақты әрі дәйекті қолдауы үшін алғыс білдіріп, Қазақстанның халықаралық қауіпсіздік пен жаһандық тұрақтылықты нығайтудағы маңызды рөлін жоғары бағалады.
Әңгіме барысында Қазақстан Президенті Махмуд Аббасты өзіне қолайлы уақытта Астанаға сапармен келуге шақырды.
