Лондон. 8 желтоқсан. ИНТЕРФАКС – 2025 жылы жаһандық жарнамаға жұмсалатын шығындар бұрын болжанғаннан жоғары қарқынмен артады. Бұған АҚШ-тың жаңа кедендік баждарының күтілгендей теріс әсер етпеуі, сондай-ақ жасанды интеллекттің саланы қолдауы себеп болып отыр. Бұл туралы WPP жарнама холдингі хабарлады.
Жаңартылған бағалауға сәйкес, АҚШ-тағы саяси жарнаманы есепке алмағанда, 2025 жылы әлемдік жарнама шығындары 8,8%-ға өсіп, 1,14 трлн АҚШ долларына жетеді. Маусым айында WPP бұл көрсеткіштің 6%-ға артуын болжаған болатын.
Сонымен бірге компания 2026 жылға арналған нарық өсімі жөніндегі болжамын 6,1%-дан 7,1%-ға дейін жақсартып, жалпы көлемі 1,22 трлн доллар болады деп күтуде.
WPP Media компаниясының бизнес-аналитика жөніндегі президенті Кейт Скотт-Докинздің айтуынша, маусым айындағы бағалар кедендік баждар туралы соңғы жаңалықтарға байланысты жасалған. Ал жаз мезгілінде жаһандық нарықтарда тұтынушылық шығындардың орнықтылығы, сондай-ақ кейбір баждардың әсерін жұмсартуға бағытталған келіссөздер мен келісімдер нақты нәтиже бергені байқалды.
Оның сөзінше, жасанды интеллектке салынған инвестициялардың күрт өсуі де жарнама шығындарының бастапқы болжамдардан едәуір жоғарылауына ықпал еткен.
WPP деректеріне сәйкес, дәстүрлі және стримингтік форматтарды қоса алғанда, теледидарлық жарнамаға жұмсалатын шығындар 2025 жылы 0,6%-ға өсіп, 167,5 млрд долларға жетеді, ал 2026 жылы 2,1%-ға артып, 171,1 млрд долларды құрайды. Алайда теледидардың жалпы жарнама нарығындағы үлесі былтырғы 15,8%-дан 2025 жылы 14,6%-ға, 2026 жылы 13,9%-ға дейін төмендейді.
Журналдардағы жарнама шығындары 2025 жылы 7,2%-ға, 2026 жылы 10,7%-ға қысқарады. Газеттердегі көрсеткіштер тиісінше 0,3% және 3,2%-ға азаяды.
Кинода жарнама шығындары 2025 және 2026 жылдары сәйкесінше 5,5% және 5,7%-ға өседі. Ритейл секторында бұл көрсеткіштер 11,3% және 9,4% деңгейінде болжануда.
Ең жоғары өсім қарқыны ойын индустриясындағы жарнама сегментінде күтіледі: 2025 жылы 29,5%-ға артып, 8,5 млрд долларға жетеді. Дегенмен бұл сегменттің жалпы нарықтағы үлесі небәрі 0,7%-ды құрайды.
Әлемдегі ең ірі нарық саналатын АҚШ-тағы жарнама шығындары 2025 жылдың қорытындысы бойынша 12,5%-ға өсіп, 431,2 млрд долларға жетеді деп күтілуде. Бұл есептеулерде АҚШ-тағы саяси жарнама ескерілмеген, өйткені ол сайлау жылдары мен басқа кезеңдердегі деректерді салыстыруды айтарлықтай бұрмалайды.
Қытайда 2025 жылы жарнама шығындары 6,8%-ға өсіп, 216 млрд долларға жетуі мүмкін. Ұлыбританияда бұл көрсеткіш 8% (58,4 млрд доллар), Жапонияда 5,2% (51,9 млрд доллар), Германияда 4,5% (40,8 млрд доллар) деңгейінде болжанып отыр. Әлемдегі ең ірі 10 жарнама нарығының қатарына сондай-ақ Франция, Бразилия, Канада, Үндістан, Австралия, Италия, Оңтүстік Корея, Испания, Нидерланд және Мексика кіреді.
Аймақтар бойынша алғанда, Солтүстік Америка әлемдік жарнама шығындарының 39,8%-ын, Азия-Тынық мұхиты өңірі – 31,5%-ын, Еуропа – 22,2%-ын, Латын Америкасы – 4,7%-ын құрайды.
Алдағы бес жылдық кезеңде әлемдік жарнама кірістерінің орташа жылдық өсу қарқыны (CAGR) 6,3% деңгейінде болады деп күтілуде.
