Қазақстан Республикасы Президенті жанындағы Орталық коммуникациялар қызметінің хабарлауынша: “Қазақстан Республикасының Президенті Қасым-Жомарт Тоқаев Тәуелсіз Мемлекеттер Достастығына мүше мемлекеттер басшыларының бейресми кездесуіне қатысты. Бейресми кездесуге Қазақстан Президенті Қасым-Жомарт Тоқаевпен қатар Ресей Федерациясының Президенті Владимир Путин, Армения Республикасының Премьер-министрі Никол Пашинян, Беларусь Республикасының Президенті Александр Лукашенко, Қырғыз Республикасының Президенті Садыр Жапаров, Тәжікстан Республикасының Президенті Эмомали Рахмон, Түрікменстан Президенті Сердар Бердімұхамедов және Өзбекстан Республикасының Президенті Шавкат Мирзиёев қатысты. Іс-шара барысында ТМД елдерінің басшылары Достастық аясындағы дамудың негізгі бағыттарын талқылап, практикалық ынтымақтастықты одан әрі нығайтуға арналған келесі қадамдарды айқындады. Сондай-ақ ТМД шеңберіндегі өзара байланыстарға қатысты өзекті мәселелер бойынша пікір алмасу өтті.
Евразия24 пікірі:
Бір күн бұрын Санкт-Петербург қаласында шамалас күн тәртібімен Еуразиялық экономикалық жоғары кеңестің тар құрамдағы отырысы өткен болатын. Жалпы алғанда, ТМД мен ЕАЭО аясындағы институттар қауіпсіздік, экономика және әлеуметтік мәселелер бойынша тұрақты түрде пікір алмасуға мүмкіндік беретін сындарлы диалог алаңдары болып қала береді. Қазіргі жаһандық тұрақсыздық жағдайында көршілес елдермен байланыстарды сақтап қалу – маңызды саяси әрі экономикалық тетік. Қазақстан үшін мұндай кездесулер өңірлік бастамаларын ілгерілетуге қолайлы мүмкіндік саналады. Мемлекет басшысы Қасым-Жомарт Тоқаев бірнеше рет экономикалық ынтымақтастықты кеңейту және логистикалық ықпалдастықты тереңдету мәселелерін көтеріп келеді. Атап айтқанда, ортақ инфрақұрылымды дамыту, көлік дәліздерінің цифрлық карталарын қалыптастыру бастамалары Қазақстанның сауда байланыстарына тікелей пайда әкеліп қана қоймай, тұтастай өңір елдерінің өзара байланысын нығайтуға ықпал етуі мүмкін. Еуразиялық ықпалдастық Қазақстан басшылығы үшін өңірде қолданыстағы келісімдер мен болашақ біртұтас нарықтар аясында басым бағыт болып қала береді. Бұл ретте Еуразиялық экономикалық одақ шеңберіндегі сауда-экономикалық қатынастардың дамуында оң серпін байқалып отыр.
