Қаржылық мониторинг агенттігінің мәліметінше, Алматы қаласында RILO–Мәскеу жүйесіне мүше елдердің Ұлттық байланыс орталықтары жетекшілерінің 24-отырысы өтті. Жиынға 9 мемлекеттен 20 делегат қатысты. RILO–Мәскеу — Дүниежүзілік кеден ұйымының аймақтық құрылымы. Оның негізгі міндеті — контрабандаға қарсы іс-қимыл бағытында құқық қорғау ақпаратын тиімді алмасуды қамтамасыз ету. Отырыста қатысушылар Ұлттық байланыс орталықтарының атқарған жұмысына талдау жасап, өткен кезең бойынша қорытынды жасады. Қаржылық мониторинг агенттігінің жұмысы жөнінде Қазақстан Республикасы Қаржылық мониторинг агенттігі Оперативтік департаментінің аға жедел уәкілі Ерлан Бимақанов баяндама жасады. Оның айтуынша, Агенттік қаржылық қылмыстар мен тауарларды заңсыз тасымалдауға қарсы іс-қимыл бағытында ауқымды жұмыс атқарған. Атап айтқанда, Дүниежүзілік кеден ұйымының Customs Enforcement Network (CEN) деректер базасына анықталған 14 құқық бұзушылыққа қатысты ақпарат енгізілген. Сонымен қатар Агенттік халықаралық пошта жөнелтілімдері арқылы тыйым салынған заттарды анықтауға бағытталған төрт арнайы операция мен екі халықаралық жобаға қатысқан.
Евразия24 пікірі:
2025 жылдың маусым айында контрабанда мәселесіне арналған отырыста «AMANAT» партиясы жыл сайын Қазақстанға заңсыз жолмен шамамен 76 мың көлік әкелінетінін мәлімдеді (дереккөз). Бұлар кеденшілердің көзіне түспей, шекарадан оңай өте салатын шұлық немесе темекі секілді ұсақ тауар емес. Оның үстіне ұсақ тауардың өзі, әдетте, шекаралық бақылаудан жасырыну үшін жүк көліктерімен тасымалданады. Мұндай жағдайда контрабандамен күрес мәселесі кеден мен шекара қызметінің кәсіби жауапкершілігімен тікелей байланысты екені айтпаса да түсінікті. Алайда, бақылауға жауапты құрылымдардың әрекеті кейде осы проблемамен күрес емес, сол жүйенің ажырамас бөлігі сияқты қабылданады.
Елге көлеңкелі импорт қандай жолмен кіріп жатқанын толық біле бермеуіміз мүмкін. Бірақ бұл құдды бір көзден таса жерасты жолдарымен тауар тасымалданып жатқандай әсер қалдырады. Егер жағдай ондай болмаса, онда бұл көлемдегі заңсыз қозғалысқа қалайша көз жұмылып отыр?
