РБК агенттігінің хабарлауынша: «Ресей Арменияға қатысты Ұжымдық қауіпсіздік туралы шарт ұйымы (ҰҚШҰ) Жарғысының 25-бабын қолдану мәселесін қарауды ұсынды. Бұл бапқа сәйкес, ұйым Арменияны дауыс беру құқығынан, сондай-ақ квота бойынша бөлінетін лауазымдарға өз кандидаттарын ұсыну мүмкіндігінен айыруы мүмкін. ҰҚШҰ Ұжымдық қауіпсіздік кеңесі Арменияға қатысты Жарғының 25-бабын қолдану мәселесін күн тәртібіне енгізілген жағдайда қарай алады. Бұл туралы ұйымның бас хатшысы Таалатбек Масадыков Еуразиялық қауіпсіздік жөніндегі IV Минск халықаралық конференциясында журналистерге мәлімдеді. Масадыковтың айтуынша, Арменияға қатысты аталған бапты қолдану туралы шешім жобасын Ресей ұсынған. Ол талқыланып жатқан мәселе «мүшелік жарналарға және, былайша айтқанда, ұйым құрамында бола тұра, оның жұмысына қатыспауға» байланысты екенін түсіндірді. ҰҚШҰ Жарғысының 25-бабына сәйкес, ұйым бюджетіне мүшелік жарнаны екі жыл бойы төлемеген елдің дауыс беру құқығын Ұжымдық қауіпсіздік кеңесі уақытша тоқтата алады. Сондай-ақ берешегі толық өтелгенге дейін бұл мемлекет ұйымдағы квоталық лауазымдарға өз азаматтарын ұсыну құқығынан айырылуы мүмкін».
Еуразия24 пікірі:
Армения мен ҰҚШҰ арасындағы келіспеушілік бірнеше жылдан бері жалғасып келеді. Қазір бұл текетірес шегіне жетуге таяғандай. Оның басты себебі мүшелік жарнаға байланысты емес. Ереван ҰҚШҰ-ны 2021–2022 жылдары Әзербайжанмен болған қарулы қақтығыстар кезінде Арменияның қауіпсіздігін қамтамасыз етпеді деп айыптайды. Армения билігі одақтас елдердің көмегіне үміт артқанымен, күткен қолдауын ала алмады.
«Менің ойымша, ҰҚШҰ Армения алдындағы қауіпсіздік жөніндегі міндеттемелерін, әсіресе 2021–2022 жылдары орындамады. Мұның салдарсыз қалуы мүмкін емес еді», – деп 2024 жылы ақпанда Никол Пашинянның сөзін келтірген еді бұқаралық ақпарат құралдары. Сол кезде Армения премьер-министрі елінің ҰҚШҰ жұмысына қатысуын іс жүзінде тоқтатқанын мәлімдеген болатын.
Содан бері Армения ұйым қызметіне іс жүзінде қатыспай келеді. Дегенмен заң жүзінде әлі де ҰҚШҰ мүшесі болып саналады.Ресейдің Арменияны ҰҚШҰ аясындағы дауыс беру құқығынан айыру туралы бастамасына ел премьер-министрі бірден әрі үзілді-кесілді жауап берді.
«Бір мәселені түбегейлі айқындап алғым келеді: Армения үшін ҰҚШҰ-ға қатысты мүдделердің мәні қалмады. Біз енді бұл ұйымға мүдделі емеспіз», – деп мәлімдеді Никол Пашинян.
Бұл текетірес немен аяқталуы мүмкін? 11 қарашада Мәскеуде ҰҚШҰ саммитін өткізу жоспарланған. Жиында Арменияны дауыс беру құқығынан айыру мәселесі қаралуы ықтимал. Алайда мұндай шешім қабылдау үшін ұйымға мүше мемлекеттердің бәрі ортақ келісімге келуі керек. Оның үстіне дауыс беру құқығынан айыру Арменияның ұйым мүшелігінен шығарылатынын білдірмейді.
