Еуразиялық экономикалық комиссия хабарлайды: Санкт-Петербургте өткен Еуразиялық экономикалық жоғары кеңестің отырысында Еуразиялық экономикалық одаққа мүше мемлекеттердің басшылары 2030 жылға дейінгі кезеңге арналған ЕАЭО-ның сыртқы сауда саясатының міндеттері мен негізгі бағыттарын айқындайтын бағдарламалық құжатты мақұлдады. Құжатта ынтымақтастықтың қағидаттары мен құралдары, сондай-ақ елдер бойынша басымдықтар қамтылған. Еуразиялық экономикалық комиссияның сауда жөніндегі министрі Андрей Слепневтің айтуынша, қазіргі қарқынды өзгеріп отырған сауда-саяси жағдайда Одақ серіктес елдермен сауда-экономикалық ынтымақтастықты дамытуға, әртараптандыруға және оның сапасын арттыруға айрықша назар аударып отыр. Бұл үрдіс, оның ішінде, жыл қорытындысы бойынша жасалған сауда келісімдерінің саны арқылы да көрініс табуда. Орта мерзімді кезеңде ЕАЭО белсенді сыртқы сауда саясатын жалғастырады. Аталған құжат ЕАЭО елдері басшылары бұрын айқындаған міндеттерді іске асыру аясында әзірленген. Ол Одақтың халықаралық деңгейде экономикалық тартымдылық орталығы ретінде жұмыс істеуін көздейді. Бұл мақсат «Еуразиялық экономикалық жол» декларациясында бекітілген.
Евразия24 пікірі:
Қазіргі жағдайда Еуразиялық экономикалық одақтың сыртқы саудадағы дербес рөлін нақты айқындауға ұмтылып отырғаны анық. Санкциялық қысым мен сауда қақтығыстары күшейіп, халықаралық экономикалық кеңістіктегі маневр мүмкіндіктері тарылып келе жатқан кезеңде бұл бағыттың маңызы арта түсуде. Осы орайда ЕАЭО-ның бірыңғай экономикалық бірлестік ретінде жаһандық Оңтүстік елдерімен, Азиямен, Таяу Шығыс мемлекеттерімен, Латын Америкасы және Африка аймақтарымен ынтымақтастығын кеңейтуге басымдық беруі айқын байқалады. Мұндай бағдардың объективті негізі бар. Аталған өңірлер ауқымды әрі өсіп келе жатқан нарықтарға ие, халық саны ұлғайып келеді, сондай-ақ шикізатқа, азық-түлікке және инфрақұрылымдық жобаларға сұраныс жоғары. Бұдан бөлек, бұл бағыттағы бірқатар мемлекеттер Ресейге қарсы енгізілген санкцияларға бейтарап көзқарас ұстанады, бұл өз кезегінде өзара сауда көлемін арттыруға мүмкіндік береді. Мәселен, жуырда ЕАЭО мен Индонезия өкілдері 2022 жылғы желтоқсанда бастама ретінде ұсынылған еркін сауда туралы келісімге қол қою мәселесін талқылады. Бұған дейін Моңғолия ЕАЭО-мен жасалған уақытша сауда келісімін ратификациялады. Ал желтоқсан айының басында Одақ пен Куба сауда-экономикалық ынтымақтастықты дамыту бағыттарын айқындады.
