Еуразиялық экономикалық комиссия хабарлауынша, Еуразиялық экономикалық комиссия жүргізген тұрақты мониторинг қорытындысы бойынша «Сауда» порталында Еуразиялық экономикалық одақ пен оның мүше мемлекеттеріне қатысты үшінші тараптардың шектеу шараларының жаңартылған тізілімі жарияланды. Анықталған шектеу шараларының саны қазіргі уақытта 271—ге жетіп отыр. Бұл шаралар ЕАЭО-ның негізгі сауда әріптестері және сауда-экономикалық келісімдер жасалған немесе жасалу үстіндегі елдер тарапынан сыртқы саудадағы тосқауыл ретінде көрінуі мүмкін. Сонымен қатар, Үшінші мемлекеттерден кондитерлік өнімдер әкелуге тыйым салған Иран Ислам Республикасының шектеу шарасы 2025 жылғы 15 мамырда ЕАЭО мен Иран арасындағы Еркін сауда туралы келісімнің толыққанды түрде күшіне енуіне байланысты жойылды.
Евразия24 пікірі:
ЕАЭО-ға қатысты шектеу шараларының жаңартылған тізімінде Еуроодақ тарапынан – 33, АҚШ – 32, ал Ұлыбритания – 14 тармақ тіркелген. Мәселен, Зимбабве тіс пастасына, ал Мадагаскар жөргек, көрпе және қоюлатылған сүтке байланысты арнайы тергеу жүргізуде. Бұл – ішкі өндірісті қорғау бағытындағы әрекеттер. Егер Батыс елдерінің шектеулері көбіне санкциялық сипатта болса, өзге әріптес елдердің қадамдары ұлттық өндірісті қорғауға бағытталған. Бұл – халықаралық саудадағы күрделі үдерістердің бірі әрі сауда тосқауылдарын құрудағы өзіндік бәсекелестік. Сонымен қатар, ЕАЭО-дан экспортталатын өнімдерге шектеу шараларының қолданылуы – осы өнімдердің жаһандық нарықта белгілі бір деңгейде бәсекеге қабілетті екенін де көрсетеді. Мұндай жағдайда шектеулер тек тосқауыл емес, жаңа мүмкіндіктерге жол ашады.
