Еуразиялық экономикалық комиссия хабарлайды: «Еуразия мен Оңтүстік-Шығыс Азия арасындағы сауда ағындарының өсуін, сондай-ақ жүктерді, әсіресе тез бұзылатын және жоғары технологиялық өнімдерді жылдам әрі сенімді жеткізуге деген қажеттілікті ескере отырып, әуе дәліздері мен логистикалық хабтарды дамыту бойынша күш-жігерді үйлестіру стратегиялық маңызды міндетке айналуда», — деп атап өтті семинарға қатысушыларға арналған құттықтау сөзінде ЕЭК Энергетика және инфрақұрылым жөніндегі министрі Арзыбек Кожошев.
ЕАЭО және АСЕАН мемлекеттік органдарының, бизнес құрылымдарының, халықаралық және ғылыми қоғамдастықтың өкілдері жүк авиациялық тасымалы саласында электрондық көліктік құжаттарды енгізу, көліктік ақпараттық жүйелер мен сервистердің халықаралық стандарттары, авиациялық логистикадағы технологиялар мен инновациялар мәселелері бойынша өзекті ақпаратпен бөлісті. Семинардың күн тәртібіне сондай-ақ әуе кемелері паркін жаңартуға, әуежайлардың жерүсті инфрақұрылымы объектілерін жаңғырту мен дамытуға жағдай жасау; авиакомпаниялардың авиациялық инфрақұрылымға кемсітушіліксіз қол жеткізуін қамтамасыз ету мәселелері енгізілді.
Еуразия24 пікірі:
«Еуразиялық бағыт» әлемдегі ең серпінді логистикалық нарықтардың бірі – АСЕАН-мен әуе тасымалы технологиялары саласында күш біріктіре отырып, оң қадам жасауда. Бұл өңірде авиация басқа көлік түрлеріне қосымша ретінде емес, ондаған жылдар бойы экономикалық ықпалдастықтың негізгі өзегі ретінде дамыды. Индонезия немесе Филиппин сияқты аралдық мемлекеттер үшін әуе қатынасы – экономиканың тынысы. Сондықтан АСЕАН-да цифрлық көліктік құжаттарды енгізу мен жүктерді автоматты түрде өңдеу процесі әлдеқашан қалыптасқан.
Ал ЕАЭО-дағы жағдай тарихи тұрғыдан басқаша өрбіді – мұнда логистика негізінен теміржол, құбыр желілері мен автомобиль көлігіне иек артты. Әуе тасымалы тек қымбат немесе шұғыл жүктерге арналған тар шеңберлі бағыт ретінде ғана қарастырылды. Бірақ электрондық коммерцияның, микроэлектроника, фармацевтика және тез бұзылатын өнімдер саудасының жедел өсуі жағдайды өзгертуде. Нақ осы себепті де АСЕАН-ның дайын практикалық шешімдері еуразиялық ықпалдастық үшін тиімді тәжірибе алмасу көзі бола алады. Оңтүстік-Шығыс Азияда қазірдің өзінде барлық әуежайлар дерлік қағазсыз құжат айналымына көшкен, жүктердің қозғалысын нақты уақытында қадағалайды және кедендік рәсімдерді логистикалық платформалармен біріктірген.
«Аймақтық бірлестіктеріміздің табысты тәжірибелерін қолданысқа енгізу ЕАЭО мен АСЕАН-ның Еуропа мен Азия арасындағы көлік қатынасы және транзиттік тасымал саласындағы көрсеткіштерін айтарлықтай жақсарта алады», – деп атап өтті семинар барысында ЕЭК Көлік және инфрақұрылым департаментінің директоры Рустан Жаналинов.
