ҚР Көлік министрлігінің хабарлауынша, Астанада Транскаспий халықаралық көлік бағыты үйлестіру платформасы аясында Үшінші қазақстандық ұлттық семинар өтті. Іс-шараның ашылуында Қазақстан Республикасының Көлік вице-министрі Талғат Ластаев пен Еуропалық одақтың Қазақстандағы Өкілдігінің Елшісі Алешка Симкич құттықтау сөз сөйледі. Өз сөзінде вице-министр Орталық дәліздің Қазақстанның көлік жүйесі үшін стратегиялық маңызына тоқталып, соңғы жылдары бұл саланың тұрақты әрі оң даму қарқынын көрсетіп отырғанын атап өтті. (…) Каспий теңізіндегі өткізу қабілеті төмен тұстарды жоюға, флотты дамытуға, порттардың әлеуетін арттыруға және теңіз инфрақұрылымы саласындағы сабақтас бастамаларды іске асыруға ерекше назар аударылды. Жұмсақ өзара байланысқа арналған сессия барысында сауда рәсімдерін жеңілдету, кедендік әкімшілендіруді жетілдіру және мультимодальды тасымалды дамыту мәселелері талқыланды.
Еуразия24 пікірі:
Транскаспий халықаралық көлік бағыты (ТХКБ) немесе «Орталық дәліз» — соңғы жылдардағы ең бірегей логистикалық жобалардың бірі. Бұл бағыт Қытай мен Еуропаны Ресей аумағын және Суэц каналы арқылы өтетін дәстүрлі теңіз жолдарын айналып өтіп байланыстыратын Еуразиядағы жалғыз ірі бағытқа айналды. Дәл осы себепті соңғы бірнеше жылда аталған жобаға деген қызығушылық қарқынды түрде артып келеді. Қазақстанға келетін болсақ, кезінде еліміз ірі нарықтар арасындағы транзиттік аумақ ретінде ғана қабылданатын. Ал қазір Орталық дәліздің арқасында жаңа еуразиялық логистиканың негізгі тоғысу тораптарының біріне айналып отыр. Жүк тасымалы Қытай, Қазақстан, Әзербайжан, Грузия арқылы Еуропаға бағытталады, яғни қазақстандық инфрақұрылымсыз бұл бағыттың жұмыс істеуі мүмкін емес. Еуропалық одақ, халықаралық қаржы институттары мен әлемдік жетекші көлік компаниялары тарапынан елімізге деген назардың артуы және Қазақстанға мәртебелі қонақтардың жиі келуі осымен түсіндіріледі. Әсіресе, өткен семинарда жалпылама декларациялар емес, Каспий теңізіндегі порттарды дамыту, флотты ұлғайту, өткізу қабілеті төмен тұстарды жою, кедендік рәсімдерді жаңғырту және мультимодальды тасымалдар сияқты нақты тәжірибелік мәселелердің талқылануы ерекше маңызға ие. Бұл жобаның тұжырымдамалық кезеңнен іске асыру сатысына толық көшкенін айғақтайды.
