ҚР Үкіметінің хабарлауынша: «Президенттің Каспий теңізін кешенді зерттеу, оны сақтау және өңірдің экологиялық тұрақтылығын қамтамасыз ету жөніндегі тапсырмаларын іске асыру аясында Үкімет резервінен «Каспий теңізі ғылыми-зерттеу институты» АҚ-ға 1,1 млрд теңге бөлінді. Тиісті қаулыға Премьер-министр Олжас Бектенов қол қойды. Бөлінген қаржы институттың ғылыми әлеуетін күшейтуге бағытталады. Қаражат теңіздік мониторинг жүргізуге арналған жабдықтарды сатып алуға, сондай-ақ гидробиологиялық және гидрохимиялық зертханаларды жарақтандыруға жұмсалады. Бұл ғылыми-зерттеу институтына теңіз акваториясында кешенді мониторинг жүргізуге, оның ішінде гидрометеорологиялық және биологиялық көрсеткіштерге жүйелі бақылау жасауға, сондай-ақ теңіздің қазақстандық бөлігінде жүріп жатқан үдерістер бойынша ғылыми негізделген деректер қорын кеңейтуге мүмкіндік береді. Қазіргі уақытта тиімді шешімдер әзірлеу мақсатында институт халықаралық ғылыми қауымдастықпен белсенді ықпалдасып, Каспий маңы елдерінің университеттері мен ғылыми-зерттеу орталықтарының қауымдастығына мүше болды».
Еуразия24 пікірі:
Каспий маңы елдерінің барлығы теңізді сақтауға мүдделі және осы бағытта ғылыми әрі практикалық шаралар қабылдап келеді. Әзербайжан экологиялық ынтымақтастықты нығайтып, биоалуантүрлілікті қорғау мен мониторингті кеңейту жұмыстарын жүргізуде, сондай-ақ ұлттық деңгейде Каспийге балық шабақтарын жіберу және жағалау бойында қорғалатын табиғи аумақтар құру ісін жүзеге асырып жатыр. Иран Каспийдің орнықты дамуына арналған халықаралық ғылыми конференциялар мен кездесулерге тұрақты түрде қатысып, ғылыми алмасуды және ластанумен күрес, экожүйені қалпына келтіру бағытындағы бірлескен жұмысты күшейтуде. Ресей Каспийдің биологиялық ресурстарын қорғауға қатысты ғылыми жобаларға қатысумен қатар, заңсыз балық аулауға қарсы іс-қимылды белсенді жүргізіп келеді. Түрікменстан Каспий экожүйесін қорғау және орнықты дамыту жөніндегі өңірлік бастамаларды ілгерілетіп, ғылыми-практикалық конференциялар ұйымдастырады және жағалаудағы мемлекеттердің кездесулеріне қатысады. 2025–2026 жылдары Түрікменстан Каспий теңізінің су биоресурстарын қорғау және ұтымды пайдалану жөніндегі комиссияға төрағалық етуде. Сонымен қатар, ғылыми ынтымақтастықтың артуына қарамастан, Каспий теңізінің экологиялық жағдайы нашарлауын жалғастырып отыр. Әсіресе теңіздің тартылуы аса өзекті мәселеге айналды. Соңғы 15–20 жылда теңіз деңгейі Еділ өзені арқылы келетін су ағынының азаюы (жалпы ағынның шамамен 85%-ын қамтамасыз етеді), климаттың өзгеруі және өзен ағынын бөгеттер арқылы реттеу факторларының әсерінен тұрақты түрде төмендеуде. Климаттық үдерістерге Каспий маңы мемлекеттерінің ешқайсысы тікелей ықпал ете алмайды. Дегенмен әрбір ел Каспийдің экологиялық мүддесін экономикалық және энергетикалық басымдықтардан жоғары қойған жағдайда, теңізді сақтап қалу мүмкіндігі арта түсер еді.
