Өзбекстан СІМ хабарлауынша, 2025 жылғы 26 тамызда Өзбекстан Республикасының бастамасымен Ауғанстан мәселесі бойынша Орталық Азия елдерінің арнайы өкілдерінің алғашқы кездесуі өтті. Іс-шараға Өзбекстан, Қазақстан, Қырғызстан және Тәжікстан өкілдері қатысты. Кездесу қатысушылары 2024 жылғы 9 тамызда Астанада өткен Орталық Азия мемлекеттері басшыларының алтыншы Консультативтік кездесуінің қорытындысы бойынша қабылданған Бірлескен мәлімдеме мен 2025–2027 жылдарға арналған өңірлік ынтымақтастықты дамыту жөніндегі жол картасына сүйене отырып, Ауғанстан мәселесі бойынша арнайы өкілдер деңгейінде Контакттік топ құрудың өзектілігі мен дер кезінде қолға алынғанын атап өтті. Бұл бастама – өңір елдерінің ортақ мүддесін көздейтін мәселелер бойынша тұрақты әрі мақсатты диалог жүргізуге арналған дербес өңірлік алаң болмақ. Қатысушылар Орталық Азия мен Ауғанстанның геостратегиялық орналасуы, тарихи байланысы бар мәдени және экономикалық кеңістігі, сондай-ақ Еуразиядағы тұрақтылықты, қауіпсіздікті және орнықты дамуды қамтамасыз етуге деген ортақ мүддені ескере отырып, Ауғанстан проблематикасына қатысты дербес көзқарас қалыптастырудың маңыздылығын ерекше атап өтті.
Саясаттанушы Рустам Бурнашев өзінің Telegram-арнасында атап өткендей, Ауғанстан мәселесі бойынша Орталық Азия елдерінің арнайы өкілдерінің алғашқы кездесуі — бұл арнайы өкілдер деңгейінде ауған тақырыбы бойынша байланыс тобының құрылуы, яғни өңірлік деңгейдегі дербес платформа ретінде қалыптасуының айқын көрінісі. «Мұнда екі маңызды жайтты ерекше атап өткен жөн. Біріншіден, кездесу барысында Ауғанстан мәселесіне өңірлік деңгейде дербес көзқарас қалыптастырудың маңыздылығы айтылды. Екіншіден, бұл — (су ресурстары жөніндегі ынтымақтастық секілді) өңірлік өзара іс-қимылдың шын мәнінде өмірлік маңызы бар мәселелерді шешуге бағытталғанын көрсететін тағы бір мысал. Бұл бұрынғыдай «ортақ тарихи-мәдени мұра» ұранымен шектелмейді», — деп жазады сарапшы. Қарапайым тілмен айтқанда, өңір елдері Ауғанстандағы ахуал алыстағы абстракция емес, тікелей шекаралас, нақты қауіп-қатерлер тудыратын мәселе екенін шынайы түсіне бастады. Бұл қауіптерге терроризм мен есірткі айналымының таралуы, этносаралық қақтығыстардың ушығуы, өңірлік тұрақсыздық пен жаппай көші-қон сияқты факторлар жатады.
