Kazinform агенттігінің хабарлауынша: Ақтауда өткен түркі әлемі елдерінің «Қорқыт ата» халықаралық кинофестивалі аясында Қазақстан Республикасы Ұлттық киноны қолдау мемлекеттік орталығы Әзербайжан, Қырғызстан, Түрікменстан, Түркия және Өзбекстанның кино саласындағы мемлекеттік ұйымдарымен ынтымақтастық туралы меморандумдарға қол қойды. Аталған келісімдер Халықаралық Түркі мәдениеті ұйымы – ТҮРКСОЙ аясындағы өзара іс-қимылды дамыту бағытында атқарылып жатқан кең көлемді жұмыстың бір бөлігі болып табылады. Олар түркі халықтарының ортақ құндылықтары мен тарихи мұрасын бейнелейтін киноөнер арқылы мәдени бірлікті нығайтуға бағытталған.
Евразия24 пікірі:
Бір апта бұрын Парижде Қазақстан мен Франция кинематография, анимация және балалар контентін жасау бағыттарында әріптестік орнатуға келісті. Қазақстан Республикасының Мәдениет және ақпарат министрі Айда Балаева бұл оқиғаны екі ел арасындағы «мәдени диалогтың жаңа кезеңі» ретінде атап өтті. Ал енді ТҮРКСОЙ ұйымы аясында қазақстандық кинематографистердің Әзербайжан, Қырғызстан, Түрікменстан, Түркия және Өзбекстандағы әріптестерімен тәжірибе, кадр, идея алмасуға толық мүмкіндігі бар. Алайда қазіргі таңда отандық кино саласының мамандарын шетелдік байланыстардың жоқтығы емес, ең алдымен, ішкі мәселелер көбірек алаңдатып отыр. Атап айтқанда, кино жобаларды қаржыландыру, оларды прокатқа шығару, сондай-ақ мемлекеттік қаржыландыруға ұсынылатын фильмдерді іріктеу жүйесі мәселелері өзекті күйінде қалып отыр. Бұл мәселелер 2025 жылы тамызда өткен бірлескен баспасөз мәслихатында ашық түрде көтерілген болатын . Соған қарамастан, халықаралық қолдаудың болуы отандық кино саласының өкілдеріне сенімді жұмыс істеуге мүмкіндік береді.
