Қырғыз Республикасының ірі әкімшілік орталығы саналатын Ош қаласында Абай Құнанбайұлына арналған көше, ескерткіш және музейдің ашылу салтанаты өтті. Іс-шараға Қазақстан Республикасының мәдениет және ақпарат министрі Аида Балаева, Қырғыз Республикасының мәдениет, ақпарат, спорт және жастар саясаты министрінің орынбасары Аскаралы Мадаминов, Ош қаласының мэрі Женишбек Токторбаев, сондай-ақ дипломатиялық корпус өкілдері мен шығармашылық зиялы қауым қатысты. Жиналғандарға арнаған сөзінде Аида Балаева осы бастаманың жүзеге асуына қолдау көрсеткені үшін алғыс білдірді: «Биыл тамыз айында Бішкек қаласында Мұхтар Әуезов пен Шыңғыс Айтматовқа арналған ескерткіш ашылған болатын. Бүгін сол игі дәстүр Ош жерінде жалғасып отыр. Бұл тек мәдени нысандар ғана емес, бұл – халықтарымыз арасындағы бауырластықтың, рухани сабақтастық пен өзара құрметтің мәңгілік белгісі. Бұл – болашақ ұрпақтарды білімге, мәдениетке және жасампаздыққа жетелейтін ортақ құндылық», – деп атап өтті министр.
Евразия24 пікірі:
Оқиға, сөзсіз, ерекше маңызға ие. Ұлы Абайдың есімі енді бауырлас Қырғыз елінде көше мен музейге беріліп қана қоймай, Қазақстан Республикасының Мәдениет және ақпарат министрі Аида Балаеваның Қырғызстанға жұмыс сапары аясында Қазақстан Президенті Қасым-Жомарт Тоқаевтың «Әке туралы сөз» («Атамжөнүндө баян») атты кітабының қырғыз тіліне аударылған нұсқасы таныстырылды. Министрдің айтуынша, бұл басылым – екі ел арасындағы әдеби байланыстарды жаңа сапалық деңгейге көтеретін елеулі қадам. Сондай-ақ ол ортақ тарихи-мәдени кеңістігіміздің заңды жалғасы және қос бауырлас халықтың рухани сабақтастығының айқын көрінісі екенін атап өтті. Бұл сөздің жаны бар. Әлемдік ақпараттық, сауда-саттық, саяси, экономикалық және гуманитарлық қақтығыстар күшейген кезеңде халықтар арасындағы өзара түсіністік пен рухани жақындықты сақтау, ұлы тұлғалар мен өткеннің ерліктерін ұмытпау, мәдени құндылықтарды шекарадан тыс кеңістіктерге жеткізу және олардың шынайы құрметке ие болуы – ерекше маңызға ие.
