ТМД Парламентаралық Ассамблеясының арнасы «Сән достастығы» форумынан хабарлайды: ТМД мемлекеттерінің жеңіл өнеркәсіп саласын жаңа технологиялық сатыға көтеруге толық әлеуеті бар. Бұл туралы ТМД Парламентаралық Ассамблеясы Кеңесінің Бас хатшысы Дмитрий Кобицкий форумның қорытындысы бойынша мәлімдеді. Оның айтуынша, үш күнге созылған шара өз миссиясын толық атқарды – яғни, ТМД кеңістігінде мемлекеттік саясат, экономика, мәдениет пен жаңа технологиялар түйісетін, жеңіл өнеркәсіп пен креативті индустриялардың дамуына жол ашатын тиімді алаңға айналды. «Бүгінгі міндет – бұл салаларды тек қолдап қана қоймай, оларды жаңа технологиялық деңгейге бейімдеу. Сонымен қатар, біздің мәдени мұрамызды ұмытпай, оны ұрпақтан-ұрпаққа жеткізудің маңызын да ескерген жөн», – деді Бас хатшы. Ол әсіресе жас мамандарды даярлауға баса назар аудару қажеттігін атап өтті. «Біз форум барысында креативті индустриялар мен жеңіл өнеркәсіп саласында өзін көрсетіп жүрген, дарынды жастарды көрдік. Олар дәстүрді бағалай отырып, заманауи талаптарға сай, жаһандық әрі технологиялық тұрғыда ойлай алады. Осы ұрпақтың әлеуетін дамыту үшін нақты жағдай жасауымыз қажет. Бұл – байқаулар, гранттық қолдау, тағылымдамалар ұйымдастыру, әрі қарай өндірістік ортаға бейімдеу секілді кешенді шараларды қамтуы тиіс», – деді Дмитрий Кобицкий.
Евразия24 пікірі:
Сауда және интеграция министрлігінің сыртқы сауда қызметі департаментіне қарасты көпжақты өзара іс-қимыл басқармасының басшысы Дина Сапарованың айтуынша, Қазақстанда жеңіл өнеркәсіп тек қаржылық құралдармен ғана емес, сондай-ақ бейқаржылық тетіктер арқылы да қолдау табуда. Атап айтқанда, экспортты қолдау арқылы отандық кәсіпорындардың халықаралық сауда алаңдарына шығуына жағдай жасалып отыр. Өнеркәсіп және құрылыс министрлігіне қарасты жеңіл өнеркәсіп басқармасының басшысы міндетін атқарушы Айгерім Исабекова да бұл саланың жан-жақты мемлекеттік қолдау жүйесінде екенін атап өтті. Оның мәліметінше, бүгінде Қазақстанда 16 арнайы экономикалық аймақ пен 130 технопарк жұмыс істеп тұр. Онда орналасқан кәсіпорындарға салықтық жеңілдіктер қарастырылып, дайын инфрақұрылым қолжетімді етілген. Мұндай ауқымды іс-шараларда, мысалы, «Сән достастығы» форумы сияқты жүздеген спикер – оның ішінде мемлекеттік органдардың өкілдері бас қосқан кезде, сөзсіз, салалық кедергілер, мемлекеттік қолдау шаралары, халықаралық нарықтарға шығуды жеңілдету, ТМД елдері арасындағы заңнамалық бастамалар және бәсекеге қабілеттілікті арттыру мен өңірлік интеграцияны нығайту мәселелері кеңінен талқыланады. Қазақстан үшін мұндай форумдарға қатысу — стратегиялық тұрғыдан аса маңызды. Министрлік өкілдері мен кәсіпкерлер көршілес мемлекеттермен тәжірибе алмасып, инвестиция тартуға және жеңіл өнеркәсіп өнімінің экспортын дамытуға мүмкіндік алады.
