Қазақстанда дәрілік заттарды тіркеу мерзімі екі есеге қысқаруы мүмкін
Астана. 25 ақпан. ИНТЕРФАКС-ҚАЗАҚСТАН – Қазақстан Парламенті Мәжілісі сәрсенбі күнгі пленарлық отырыста «Ғылым мәселелері бойынша кейбір заңнамалық актілерге өзгерістер мен толықтырулар енгізу туралы» заң жобасын бірінші оқылымда мақұлдады.
Заң жобасын депутаттар бастамашылық еткен. Ол ғылым және ғылыми-техникалық қызмет саласындағы қоғамдық қатынастарды құқықтық реттеудің негіздерін жетілдіруге бағытталғанын мәжілісмен Асхат Аймағамбетов мәлімдеді.
Құжатта ғалымдар мен ғылыми қызметкерлердің мәртебесі айқындалып, олардың құқықтары мен бостандықтарын қорғау, академиялық еркіндік пен шығармашылық еркіндікке кепілдік беру көзделген.
Түзетулер Азаматтық, Қылмыстық-атқару, Еңбек, Әлеуметтік, Бюджет кодекстеріне, «Халық денсаулығы және денсаулық сақтау жүйесі туралы» кодекске, сондай-ақ бірқатар заңдарға енгізіледі.
Атап айтқанда, денсаулық сақтау саласында жоғары технологиялық медициналық көмектің бірыңғай стандарттарын қамтамасыз ететін, диагностика дәлдігін арттыратын және әдістемелік қолдау көрсететін референс-орталықтар құру қарастырылған.
Сонымен қатар дәрілік заттарды тіркеу және қайта тіркеу тәртібі кешенді мемлекеттік қызмет форматына оңтайландырылып, халыққа қажетті дәрілер мен медициналық бұйымдардың отандық нарыққа шығу үдерісін жеделдетуге мүмкіндік береді.
«Дәрілік заттарды тіркеу мерзімі едәуір қысқарады. Қолданыстағы заңнамаға сәйкес тіркеу рәсімі 210 күнге дейін созылады, ал іс жүзінде бұл процесс одан да ұзаққа созылуы мүмкін. Ұсынылған нормалар мерзімді 100 күнге дейін қысқартуға мүмкіндік береді», – деді Аймағамбетов.
Сондай-ақ, оның айтуынша, дәрілік препараттардың сапасына бақылау күшейтіледі.
Ғылыми зерттеулер саласында да бірқатар өзгерістер ұсынылған.
«Ғылыми жобалар конкурстарының нәтижелерін жариялау мерзімі заңмен нақты бекітіледі. Қазіргі таңда бұл мерзімдер реттелмеген, соның салдарынан рәсімдер созылып, ғалымдар белгісіздік жағдайында қалады. Біз нәтижелерді белгіленген мерзімде жариялауды міндеттейтін норманы енгізіп отырмыз», – деді депутат.
Құжатта ғылыми қызметкерлердің еңбек құқықтарының теңдігін қамтамасыз ету де қарастырылған.
«Мемлекеттік тапсырысты орындайтын барлық ғылыми қызметкерлерге, оның ішінде жеке ұйымдарда жұмыс істейтін мамандарға 56 күндік ақылы демалыс беру көзделеді. Ғылымда мемлекеттік және жекеменшік зерттеу деп бөліну болмайды, талаптар бірдей, демек құқықтар да тең болуы тиіс», – деп түсіндірді.
