Вашингтон. 25 ақпан. ИНТЕРФАКС – АҚШ президенті Дональд Трамп Конгреске жасаған жолдауында екінші мерзіміндегі әкімшілігінің жұмысы туралы есеп беріп, бірқатар жетістіктерін атап өтті.
АҚШ басшысы, атап айтқанда, рецептпен берілетін дәрі-дәрмектер бағасын төмендету бағытындағы жұмысты ерекше атап өтті.
«Мен сондай-ақ рецепт арқылы берілетін дәрілердің негізсіз жоғары бағасын жойдым, бұған дейін мұндай ешқашан болған емес», – деді Трамп.
Оның айтуынша, бұған дейінгі президенттер де мұндай қадам жасауға тырысқанымен, нәтиже шығара алмаған.
Трамптың сөзінше, қабылданған шаралар нәтижесінде баға айырмашылығы 300–600% және одан да жоғары деңгейде қысқарған, ал бұл мәліметтер TrumpRx.gov атты жаңа сайтта қолжетімді.
Сонымен қатар, ол денсаулық сақтау саласына қатысты жоспарын да мәлімдеді. Президент ірі сақтандыру компанияларына төленетін қаражатты қысқартып, оны тікелей азаматтардың өз медициналық қызметін төлеуіне бағыттауды ұсынды. Оның пікірінше, бұл медициналық көмекті сапалы әрі арзанырақ етеді.
Трамп сондай-ақ бірнеше айға созылған әскери кампания барысында есірткі тасымалдауы мүмкін кемелерге қарсы әрекеттер арқылы АҚШ-қа есірткінің рекордтық көлемде келуінің жолы кесілгенін айтты.
Бұдан бөлек, ол елдегі кісі өлтіру деңгейі соңғы 125 жылдағы ең төмен көрсеткішке жеткенін мәлімдеді.
«Өткен жылы кісі өлтіру деңгейі бақылау тарихындағы ең жоғары қарқынмен төмендеді. Бұл – 125 жылдағы ең төменгі көрсеткіш», – деді ол.
Президенттің айтуынша, қазіргі кезең «Американың алтын ғасыры» болып табылады.
«Экономика бұрын-соңды болмаған қарқынмен өсіп жатыр», – деді Трамп.
АҚШ президентінің бұл жолғы Конгреске жолдауы ел тарихындағы ең ұзақ сөз сөйлеу болып, 108 минутқа созылды. Бұған дейінгі рекорд Билл Клинтонға тиесілі еді: оның 1995 жылғы жолдауы 85 минут, ал 2000 жылғысы 89 минутқа созылған.
