Атырау облысының Жангелдин ауылында 2025 жылы болған жан түршігерлік оқиға көпшіліктің есінде. Сол кезде жергілікті тұрғын Сұлтан Сәрсемәлиев әйелінің бүкіл отбасын – ата-анасын, бауыры мен сіңілсін өлтірген болатын.
Деректерге сәйкес, Сәрсемәлиевпен бірге оның жұбайы Ақбаян Мұқанғалиева да қылмыс туралы хабарламағаны үшін заң алдында жауап беруі тиіс еді. Айта кетейік, екеуі де 2026 жылы наурызда Индонезияда тергеуден жасырынып жүрген жерінен ұсталып, Қазақстанға экстрадицияланған болатын.
«Атырау облысының прокуратурасы төрт бірдей туысының өліміне қатысты көпшілік назарын аударған іс бойынша қылмыс туралы хабарламады деген күдікке ілінген Ақбаян Мұқанғалиеваға қатысты қылмыстық істі тоқтатты», – деп хабарлайды CMN.KZ.
Қылмыстық істі тоқтатуға қылмыстық құқық бұзушылық құрамының болмауы негіз болған.
Басылымның Атырау облысы прокурорының көмекшісіне сілтеме жасап хабарлауынша, сотқа дейінгі тергеп-тексеру барысында әйелдің әрекеттерінен кінә дәлелденбеген.
Сондай-ақ бұқаралық ақпарат құралдарының хабарлауынша, экстрадициядан кейін Ақбаян Мұқанғалиева Атырау мен Алматы қалаларында бірнеше рет сот-психиатриялық сараптамадан өткен. Алайда мамандар оның психикалық жай-күйіне қатысты бірыңғай қорытындыға келе алмаған. Осыған байланысты ол қазіргі уақытта Атырауда ем қабылдап жатыр.
Әйелдің расымен де психикалық денсаулығына байланысты мәселелері болуы әбден мүмкін. Өйткені жұбайына өмір бойына бас бостандығынан айыру жазасын тағайындау сұралған, өз отбасының түгелге жуық мүшесі қаза тапқан мұндай қайғылы оқиғаны бастан өткеріп, психологиялық тұрғыдан ауыр зардап шекпеу кез келген адам үшін оңай емес. Оның үстіне ол сотталушының жұбайы ретінде онымен он жыл отбасылық өмір сүрген.
