Atameken Business басылымының хабарлауынша, Алматыда электрсамокаттардың рұқсат етілген жылдамдығын сағатына 25 шақырымға дейін арттыруды талап еткен петиция жарияланды. Петиция авторлары қолданыстағы сағатына 10–15 шақырымдық шектеу биіктік айырмасы көп қала үшін тым төмен деп есептейді. Олардың айтуынша, еңістерге көтерілген кезде электрсамокаттардың жылдамдығы күрт төмендеп, бұл көлік түрінің қолайлылығын азайтады. Құжатта велосипед жолақтарында қозғалыс жылдамдығын сағатына 25 шақырымға дейін, қала көшелерінде 15–20 шақырымға дейін арттыру ұсынылған. Ал мектептер, ауруханалар, балабақшалар мен саябақтар маңында қолданыстағы сағатына 10 шақырымдық шектеуді сақтап қалу көзделген.
Еуразия24 пікірі:
Алдымен петиция авторларының пікіріне тоқтала кетейік. Құжатта былай делінген: «Әлемнің бірде-бір ірі мегаполисінде электрсамокаттарға мұндай қатаң әрі жеткілікті негізделмеген жылдамдық шектеулері енгізілген емес. Әлемдік тәжірибеде электрсамокаттардың ұсынылатын қозғалыс жылдамдығы сағатына 20–25 шақырымды құрайды. Бұл көрсеткіш велосипед жолақтарына да қолданылады. Ал сағатына 10–12 шақырымдық шектеу әлем елдерінде тек жаяу жүргіншілер көп шоғырланатын аймақтар мен саябақтарда ғана қолданылады. Алматы әкімдігі болса, мұндай шектеуді барлық тротуарларға, тіпті жолдың жүріс бөлігіне де бірдей белгілеп, ақылға қонымды әрі ғылыми тұрғыдан негізделген межеден төмен деңгей бекітті». Дегенмен әлемнің көптеген ірі қалаларында дәл Алматыдағыдай электрсамокатты пайдалану мәдениетіне қатысты түйткілдер қалыптаспағанын да ескерген жөн. Бір самокатпен екі, тіпті үш адамның қатар жүруі, тар тротуарларда жоғары жылдамдықпен қозғалу, жаяу жүргіншілердің қауіпсіздігін елемеу, жол қозғалысы ережелерін сақтамай жолды кесіп өту, сондай-ақ кәмелетке толмағандардың электрсамокат басқаруы – мұның бәрі соңғы бірнеше жыл бойы қоғамда кеңінен талқыланып келе жатқан мәселелер. Сондықтан Алматы әкімдігінің шектеу шараларын енгізуі негізсіз шешім деуге келмейді. Электрсамокаттардың қатысуымен болатын жол-көлік оқиғаларының жиілеуі және тұрғындар тарапынан әкімдікке түскен көптеген шағымдар мұндай шешім қабылдауға негіз болған.
