Таразда қыз алып қашқан Алматы облысының үш тұрғыны үш жылдан бас бостандығынан айырылды.
«Тергеу барысында жәбірленушінің қыз алып қашуды ұйымдастырған азаматпен бес жылдан астам уақыт бойы жақын қарым-қатынаста болғаны анықталды. Алайда қыз оның үйлену туралы ұсынысына бірнеше рет үзілді-кесілді қарсы болған. Соған қарамастан, ер адам қызды күштеп алып қашуды ұйғарып, бұл іске таныстарын тартқан.
Осылайша алдын ала сөз байласқан үш адам күш қолданып, күндізгі уақытта жәбірленушіні еркінен тыс алып кеткен», – деп хабарлады Бас прокуратура.
Бақылаушы орган адамның еркінен тыс некеге тұруға мәжбүрлеу мақсатында алып қашу қандай себеппен немесе қандай дәстүрмен ақталса да, қылмыстық жауапкершілікке әкеп соғатынын ескертті.
Бұл оқиға екі адамның арасында қарым-қатынас болғанының өзі қыз алып қашуды қалыпты әрекетке айналдырмайтынын тағы бір мәрте көрсетті. Соған қарамастан, заң талабын елемейтіндер әлі де кездеседі.
Нәтижесінде тойдың орнына сот үкімі шықты. Күткен неке қию рәсімінің орнына соттылық пайда болды, ал отбасылық өмірдің басталуының орнына жазасын өтеу кезеңі келді.
Бүгінде Қазақстанда қыз алып қашу үйлену рәсімін жеделдетудің тәсілі ретінде қарастырылмайды және заң алдында жауапкершіліктен босатпайды. Сондықтан әр адамның таңдауына құрметпен қарау – мұндай жағдайлардың алдын алудың ең дұрыс жолы.
