Шымкентте сәтсіз жасалған блефаропластикадан кейін пациенттің бір көзі көрмей қалған. Ота жасаған «пластикалық хирург» 1 жыл 6 айға бас бостандығынан айырылды. Кейін оның медициналық процедураны жүргізген кезде маман сертификаты да, тиісті лицензиясы да болмағаны анықталды.
ҚР Бас прокуратурасының мәліметінше, сот оны Қылмыстық кодекстің 322-бабының 2-бөлігі бойынша кінәлі деп таныған.
«Сот оған 1 жыл 6 ай бас бостандығынан айыру жазасын тағайындап, 3 жыл мерзімге медициналық және фармацевтикалық қызметпен айналысу құқығынан айырды. Абай ауданының прокуратурасы тиісті лицензиясы мен біліктілігі жоқ адамдарға жүгіну адамның өмірі мен денсаулығына ауыр зардап әкелуі мүмкін екенін ескертеді», – делінген Бас прокуратура таратқан ақпаратта.
Өкінішке қарай, бұл оқиғаның салдары қайтымсыз болды. Сондықтан прокуратура медициналық қызмет алатын маманды таңдағанда азаматтарды мұқият болуға шақырып отыр.
Қазір әлеуметтік желіде өзін маман ретінде таныстыратын блогерлер, түрлі «сарапшылар» мен коучтар көбейді. Соның арасында сырт көзге кәсіби мамандай көрінгенімен, іс жүзінде тиісті білімі мен біліктілігі жоқ адамға тап болу да оңай. Жарнамасы тартымды, сөзі сенімді, ал қызметін «арзанырақ әрі әдемі жасап беремін» деп ұсынған адамға сеніп қалу қиын емес. Алайда дәл осындай уәделер кейде адамды қауіп-қатерді естен шығарып, денсаулығына қатысты маңызды шешімді асығыс қабылдауға итермелеуі мүмкін.
Мәселе тек косметологияда емес. Бұған дейін де медициналық білімі барын алға тартып, өзін «емші» ретінде таныстырған адамдарға денсаулығын сеніп тапсырған жағдайлар болған.
2025 жылы Маңғыстауда медбике болып жұмыс істеген, бірақ өз бетінше медициналық қызмет көрсетуге рұқсаты болмаған әйел үйінде «халықтық ем» жүргізген. Осындай емнің бірінен кейін пациент қайтыс болды. Сот жалған емшіге 1,5 жылға бас бостандығын шектеу жазасын тағайындады.
2023 жылы Астанада тиісті рұқсат құжаттары жоқ азамат дәстүрлі емес шығыс медицинасымен айналысқан. Ол пациенттердің біріне лицензияланбаған препарат еккен. Соның салдарынан науқаста анафилаксиялық шок болып, ол көз жұмды. Кейін бұл іс бойынша сот үкімі шықты.
Демек, маман таңдағанда әдемі безендірілген кабинетке, желідегі мақтау пікірлер мен қызметтің қолжетімді бағасына ғана сену жеткіліксіз. Заңсыз медициналық қызметтің соңы әрдайым қайғылы аяқталмайтыны анық. Алайда тиісті құжатсыз ем жүргізетін жалған мамандарға жүгіну денсаулық пен өмірге төнетін қауіпті арттырады. Сондықтан өз денсаулығын біреуге сеніп тапсырмас бұрын оның білімі, біліктілігі және медициналық қызмет көрсетуге заңды құқығы бар-жоғын тексерген жөн.
