«Ақмола облысының Полиция департаменті таратқан ақпаратқа сәйкес, әлеуметтік желіде бейәдеп сөздер жазылған жарияланым әкімшілік іс қозғауға негіз болған. Жазба әлеуметтік желілерге жүргізілген мониторинг барысында анықталған. Сот Ақмола облысының тұрғынын 20 тәулікке әкімшілік қамауға алды», — деп жазады ProKadry.kz.
Арман Шураевтың өзі Facebook парақшасында Бурабай ауданы полициясының назарына нақты қай жазбасы іліккенін жазған.
Шураев бұған дейін де Ресей, Украинадағы соғыс, орыс тілі және Қазақстандағы орыстілді аудиторияның бір бөлігіне қатысты өткір әрі қатаң пікірлерімен танылған.
Атап айтқанда, Украинаның Freedom ақпараттық порталына берген сұхбатында ол Ресейдің Украинаға басып кіруін Қазақстанға жасалған шабуылдай қабылдағанын айтқан. Сондай-ақ Қазақстандағы жағдайды 2014 жылғы Украинамен салыстырып, Ресейдің ықпалындағы адамдар ел ішінде қауіп төндіруі мүмкін деген пікір білдірген.
Жуырда қазақстандық боксшы Геннадий Головкин басқаратын World Boxing халықаралық федерациясы ресейлік спортшыларға қойылған шектеулерді алып тастап, олардың халықаралық жарыстарға қатысуына рұқсат берген еді. Осы шешімнен кейін Арман Шураев Facebook парақшасында қорлайтын сөздер жазылған жазба жариялады.
Саяси ұстанымды еркін білдіру жауапкершілікті жоққа шығармайды. Әсіресе қоғамға танымал адамдардың сөзі кең таралып, көпшілікке ықпал етуі мүмкін екенін ескерген жөн.
