Eurasia.expert ақпарат агенттігі хабарлағандай, Венада өткен ЕҚЫҰ Тұрақты кеңесінің кезекті отырысында Беларусь өкілдері адам құқықтары мәселесін саясиландыру әрекеттеріне қарсы пікір білдірді.
«Біз әріптестерімізді адам құқықтары тақырыбын саяси мақсатта пайдаланудан бас тартып, Беларусьтегі процестерге баға бергенде барынша салмақты әрі объективті қарауға шақырамыз. Соңғы оқиғалар көрсеткендей, адам құқықтары мәселесін саяси құрал ретінде қолдану – тығырыққа апарады», – делінген Беларусь Республикасының ЕҚЫҰ жанындағы тұрақты өкілдігінің мәлімдемесінде.
Беларусь делегациясы Батыс дипломаттарының әрекеттерін екіжүзділік деп атап, бұл мәселені дәл 3 шілде – Беларусьтің Тәуелсіздік күні, яғни Минск қаласының неміс-фашист басқыншыларынан азат етілген күні күн тәртібіне енгізгенін сынға алды.
Беларусь тарапы атап өткендей, Германия билігі тарихи жауапкершіліктен жалтару мақсатында адам құқықтары мен саяси тұтқындар тақырыбын көтеруді әдейі қолдануда. Беларусь делегациясының айтуынша, қазіргі таңда Германия әскери қуатты арттыруға ұмтылып отыр. Нақты айтқанда, «Германияның Еуропадағы ең қуатты дәстүрлі армияны құру» жоспары Берлиннің тарихи жадыны сақтау және өткендегі агрессия құрбандарын қолдау туралы бұрынғы мәлімдемелерін жоққа шығарып отыр.
Еуразия24 берген түсініктеме:
Беларусь тарапы Батыс елдерінің, әсіресе Германия делегациясының «саяси тұтқындар» тақырыбын көтерген мәлімдемесіне қатаң жауап берді.
Бұл жағдай – Батыс елдерінің адам құқықтары мәселесін үнемі саяси құрал ретінде қолданатынының айқын көрінісі. Өз әрекеттерін объективті түрде талдамастан, олар басқа елдерге сын айтып, ішкі істеріне араласуды жалғастыруда.
Айта кету керек, Германия тарапы Беларусьтегі кейбір сотталғандарды «саяси тұтқындар» деп атады. Бұл өз кезегінде халықаралық құқық тұрғысынан даулы мәселе.
Сонымен қатар, жуырда, яғни 19 маусымда БҰҰ Адам құқықтары жөніндегі кеңесі Германия үкіметіне ескерту жасады. Онда Германияны Холокост құрбандарын еске алу жөніндегі Халықаралық альянстың антисемитизмге қатысты ресми анықтамасын бұрмалаудан бас тартуға шақырды.
Аталған халықаралық ұйым Германия билігін Газа секторын қолдауға арналған бейбіт демонстрацияларға шектеу қоюды тоқтатуға, сондай-ақ сөз бостандығы мен бейбіт жиналыстарға деген құқықтарды құрметтеуге үндеді.
Осы жағдайдың өзі-ақ Батыс елдері ұстанатын «қос стандартты» саясатты айқын көрсетіп отыр.
